32:424  In  summa,  quoniam  vult  Deus  suorum  patientiam  cruce  experiri,  diserte  hic  afflictos  alloquitur,  ne  aerumnis  succumbant,  et  liberatorem  placide  exspectent,  qui  ideo  tardius  occurrit  ut  iustus  mundi  iudex  appareat.  Sequitur,  ipsum  dare  panem*famelicis.  Unde  etiam  colligimus,  non  ita  liberaliter  semper  agere  cum  suis,  ut  plena  copia  saturentur,  sed  benedictionem  suam  interdum  subducere,  ut  succurrat  postquam  ad  esuriem  ventum  fuerit.  Si  dixisset  propheta  largiter  pasci  fideles,  et  quasi  saginari  a  Deo,  quis  non  in  fame  vel  inedia  statim  desponderet  animum?  Non  abs  re  ergo  longius  extenditur  Dei  gratia,  ut  esurientes  pascat.  Eodem  etiam  pertinent  reliqua,  Deum  vinctos  solvere,  et  illuminare  caecos.  Quia  enim  subinde  contingit  fideles  anxietate  constringi  vel  hominum  tyrannide  premi,  vel  redigi  ad  extrema,  ac  si  durissimis  ergastulis  inclusi  forent:  ideo  hanc  consolationem  proponi  necesse  fuit,  Domino  esse  faciles  exitus,  quoties  in  tales  angustias  redacti  erimus.  Illuminare  caecos,  tantundem  valet  ac  lucem  dare  ex  tenebris.  Itaque  quoties  destituimur  consilio,  perplexique  haeremus,  confusi  denique  iacemus  et  attoniti,  ac  si  incumberent  mortis  tenebrae:  discamus  Deum  ornare  hoc  elogio,  ut  caligine  discussa,  nobis  oculos  aperiat.  Sic  quum  curvos  erigere  dicitur,  discamus  colligere  animum  si  quando  sub  onere  gementes  fatiscimus.  Neque  enim  voluit  solum  Deus  hic  celebrari  laudes  suas,  sed  caecis,  captivis  et  afflictis  manum  quodammodo  ideo  porrigit,  ut  curas  suas  et  dolores  in  eum  reiiciant.  Nec  supervacuum  est  quod  ter  repetit  nomen  Iehovae:  quia  hoc  modo  ad  ipsum  quaerendum  sollicitat  et  pungit  homines,  qui  saepe  fraenum  rodendo  malunt  putrescere  in  suis  miseriis,  quam  ad  certum  hoc  asylum  se  conferre.  Quod  postremo  dicitur  Iehova  iustos  diligere,  videtur  species  esse  correctionis.  Constat  enim  plerosque,  licet  duriter  premantur,  anxii  suspirent,  iaceant  in  tenebris,  nihil  tamen  solatii  a  Deo  sentire:  nempe  quia  tunc  quoque  sua  contumacia  Deum  magis  provocant,  ac  dum  vix  centesimus  quisque  implorat  eius  gratiam,  iustam  ingratitudinis  suae  mercedem  reportant.  Itaque  non  abs  re  propheta  quod  generaliter  dixerat,  Deum  miseris  opitulari,  nunc  ad  iustos  restringit,  ut  sincero  pietatis  affectu  ei  se  addicant  qui  eum  experiri  cupiunt  liberatorem.  9.  (Iehova  custodiens)  Sub  peregrinis,  pupillis  et  viduis,  per  synecdochen  eos  omnes  propheta  complectitur  quos  deficiunt  humana  subsidia.  Quia  enim  notis  et  propinquis  quisque  favet,  peregrinos  scimus  utplurimum  iniuriis  esse  obnoxios.  Viduis  et  pupillis  qui  se  defensores  offerant  ac  vindices,  non  multi  reperiuntur:  quia  videtur  perdi.opera,  ubi  spes  nulla  compensationis  affulget.  Ergo  sub  his  exemplis  docet  propheta,  quacunque  molestia