20:424 que le premier ne nous suffisoit pas sans le seeond, et a declaire qu'il le congnoissoit, affin de nous en advertir. Parquoy celuy qui s'abstiendroit de la cene soubz ombre qui s'en pourroit bien passer, seroit seduict et aveugle de satan, se mescongnoissant soymesme. Et a cela il n'est ia mestier de longs argumens, car si nous ne voulons desmentir Jesuschrist, il nous fault recongnoistre qu'en nous instituant sa cene, il a declaire que ce nous estoit ung aide necessaire. Celuy qui sera en ung desert, ou enclos en une prison s'en pourra bien passer, ie le confesse, voire d'autant qu'il ne la peult avoir, et Dieu supplie bien ce default par la grace de son esprit, car ie n'entens point que l'esprit de Dieu soyt attache aux sacremens, mais tant y a que ce sont les moiens ordinaires par lesquelz il luy plaist besongner en nous pendant qu'il nous les donne. Ainsi maintenant puis que vous aves la commodite d'en user, gardes qu'en la mesprisant vous n'encouries devant luy ceste condamnation, d'avoir refuse sa grace au lieu de l'accepter: qu'il vous souvienne combien vous avez souspire et gemi apres, du temps que vous esties en Babylonne. Penses qu'il y a encore ung nombre infini de bons fidelles espars ca et la qui incessamment avec ung ardent desir regretent qu'ilz n'en peuvent avoir la iouissance. J'ay bien entendu que vous aves quelque difficulte, laquelle iusques icy vous a empeche, c'est a cause des ceremonies, lesquelles on vous a voulu mettre sus, pour vous faire accommoder a la facon commune de la ville ou vous etes. Quant a cela je confesse que le moins de ceremonie seroit le meilleur. Car nous voions par experience quel danger il y a qu'elle n'engendre superstition. Mais encore quant la chose n'est pas en nostre liberte, si ne fault il pas que cela nous retarde d'aspirer tousiours au principal. Ce n'est pas chose de si grande consequence que nous devions a ceste occasion nous priver voluntairement de la saincte cene du Seigneur. Desirons tousiours ce que nous congnoissons estre le meilleur: procurons qu'il se face entant qu'en nous est. S'il n'est pas en nostre puissance d'en venir a bout, supportons quelques imperfections sans les approuver, moiennant qu'il n'y ait point d'impiete, ne chose qui soit repugnante a la parole de Dieu. Comme s'il y avoit quelque apparence d'idolatrie, nous debvrions bien y resister iusques a la mort. Mais puis que la doctrine est saine et pure, et que les ceremonies ne sont que pour une honnestete civile, nous les pouvons bien passer plus tost que d'esmouvoir grand trouble et contention.7) 7) Ceci encore prouve qu'on n'en etait encore qu'au debui des exigences des Lutheriens.