32:423  423  PSALMUS  CXLVI.  424  Porro  beatos  pronuntians  quibus  in  auxilium  est  Deus,  beatitudinem  fidelium  ad  praesentem  sensum  non  restringit,  ac  si  non  aliter  beati  essent  nisi  dum  palam  et  re  ipsa  Deus  eorum  auxiliator  apparet  :  sed  in  eo  felicitatem  statuit,  si  vere  persuasi  sint  se  non  stare  nisi  Dei  gratia.  Iam  Deum  Iacob  nominando,  eum  a  falsorum  deorum  turba  discernit  quibus  tum  gloriabantur  increduli:  et  merito,  quia  utcunque  omnibus  sit  propositum,  Deum  quaerere,  vix  tamen  centesimus  quisque  rectam  viam  tenet.  Sicuti  autem  verum  Deum  sua  nota  designat:  sic  ostendit  nonnisi  certa  adoptionis  fide  fieri  ut  quisque  nostrum  in  eum  recumbat,  quia  propitium  nobis  esse  oportet,  ut  nobis  paratum  sit  eius  auxilium.  6.  Qui  fecit  coelum  et  terram,  mare,  et  omnia  quae  in  illis  sunt:  qui  custodit  veritatem  in  perpetuum  :  7.  Ius  reddens  iniuste  oppressis,  dans  panem  famelicis,  Iehova  solvens  vinctos:  8.  Iehova  illuminans  caecos,  Iehova  erigens  curvosy  Iehova  diligens  iustos.  9.  Iehova  custodiens  peregrinos,  pupillum  et  viduam  sublevat,  et  viam  impiorum  disperdet.  10.  Regnabit  Iehova  perpetuo  Deus  tuus  Sion  in  generationem  et  generationem.  Halleluiah.  6.  (Qui  fecit  coelum.)  His  omnibus  epithetis  confirmat  superiorem  doctrinam.  Etsi  enim  creationis  mentionem  facere,  videtur  primo  intuitu  remotum,  aptissime  tamen  convenit  ut  nobis  succurrat  Dei  potentia  quoties  impendet  aliquid  periculi.  Scimus  enim  quam  levibus  momentis  nos  ad  diffidentiam  Satan  impellat:  nos  vero  ad  levissimos  quosque  motus  trepide  huc  illuc  agitamur.  Atqui  si  reputamus  Deum  esse  coeli  et  terrae  opificem,  hunc  ei  honorem  merito  tribuemus,  in  manu  eius  et  arbitrio  esse  mundi  quem  creavit  imperium.  Est  igitur  in  primo  elogio  commendatio  potentiae,  quae  metus  omnes  nostros  absorbere  debet.  Sed  quia  non  sufficeret,  auxiliari  Deum  nobis  posse,  nisi  accederet  promissio  qua  testetur  se  etiam  velle,  atque  facturum,  secundo  loco  praedicat  David  fidelem  esse  et  veracem,  ut  iam  dubitationi  non  supersit  locus  ubi  nobis  comperta  est  eius  voluntas.  7.  (Ius  reddens.)  Alias  species  enumerat  tam  potentiae  quam  bonitatis  Dei,  quae  totidem  sint  nobis  bene  sperandi  argumenta.  Ad  hunc  scopum  tendunt  omnia,  opem  Dei  contemptissimis  quibusque  expositam  fore  ac  paratam:  ideoque  obstaculo  non  fore  nostras  miserias  quominus  nos  iuvet:  imo  hoc  ferre  eius  naturam,  ut  pro  cuiusque  necessitate,  ad  ferendam  cuique  opem  propensus  sit.  Primo  dicit  ius  reddere  oppressis,  ut  nobis  in  mentem  veniat:  quamvis,  secundum  carnis  nostrae  sensum,  conniveat  ad  nostras  iniurias,  non  tamen  praetermissurum  quod  officii  sui  proprium  est,  ut  improbos  ad  reddendam  violentiae  suae  rationem  trahat.