7:422  concilio  capituli  [pag.  116]  eligendum,  qui  clericos,  aliosque  scholares  pauperes  Grammaticam  gratis  doceat:  ut  deinceps  ad  ipsa  sacrae  Scripturae  studia,  annuente  Deo,  transire  possint.  Ideoque  illi  Magistro  grammatices,  vel  alicuius  simplicis  beneficii  fructus,  quos  tamdiu  percipiat,  quamdiu  in  docendo  perstiterit,  assignentur:  dum  tamen  beneficium  ipsum,  suo  debito  non  fraudetur  obsequio,  vel  ex  capitulari,  vel  Episcopali  mensa,  condigna  aliqua  merces  persolvatur  :  vel  alias  Episcopus  ipse,  aliquam  rationem  ineat  suae  Ecclesiae,  et  Diocesi  accommodam,  ne  pia  haec,  utilis  atque  fructuosa  provisio,  quovis  quaesito  colore  negligatur.  In  Monasteriis  quoque  Monachorum,  ubi  commode  fieri  queat,  etiam  lectio  sacrae  Scripturae  habeatur:  qua  in  re,  si  Abbates  negligentes  fuerint,  Episcopi  locorum  in  hoc  provideant,  ut  sedis  Apostolicae  delegati  eos  ad  id  opportunis  remediis  compellant.  In  conventibus  vero  aliorum  regularium,  in  quibus  studia  commode  vigere  [pag.  117]  possunt,  sacrae  Scripturae  lectio  similiter  habeatur:  quae  lectio  a  capitulis  generalibus  vel  provincialibus  assignetur  dignioribus  Magistris.  In  Gymnastis  etiam  publicis,  ubi  tam  honorifici,  et  caeterorum  omnium  maxime  necessaria  leccio  hactenus  instituta  non  fuerit,  religiosissimorum  Principum,  ac  Rerumpublicarum  pietate,  et  caritate,  ad  Catholicae  fidei  defensionem,  et  incrementum,  sanaeque  doctrinae  conservationem  et  propagationem  instituatur:  et  ubi  instituta  foret,  et  negligeretur,  restituatur.  Et  ne  sub  specie  pietatis  impietas  disseminetur,  statuit  eadem  sancta  Synodus,  neminem  ad  huiusmodi  lectionis  officium,  tam  publice  quam  privatim  admittendum  esse,  quin  prius  ab  Episcopo  loci,  de  vita,  moribus  et  scientia  examinatus  et  approbatus  fuerit.  Quod  tamen  de  Lectoribus  in  claustris  Monachorum  non  intelligatur.  Docentes  vero  ipsam  sacram  Scripturam,  dum  publice  in  scholis  docuerint,  [pag.  118]  et  Scholares,  qui  in  ipsis  scholis  student,  privilegiis  omnibus,  de  perceptione  fructuum,  praebendarum  et  beneficiorum  suorum  in  absentia,  a  iure  communi  concessis,  plene  gaudeant,  et  fruantur.  Quia  vero  Christianae  Reipublicae  non  minus  necessaria  est  praedicatio  Evangelii,  quam  Lectio,  et  hoc  est  praecipuum  Episcoporum  munus:  statuit  et  decrevit  eadem  sancta  Synodus,  omnes  Episcopos,  Archiepiscopos,  Primates,  et  omnes  alios  Ecclesiarum  27*