37:422  sideranda  est:  quia  ex  ea  facilius  liquebit  prophetae  consilium.  Quum  de  operibus  patrum  nuper  loquutus  sit,  dubium  non  est  quin  eos  rideat  qui  in  iis  defensionem  suam  locabant.  Est  enim  leve  atque  inane  praesidium:  et  certe  observationes  patrum,  hoc  est  diuturnam  corruptelam,  obiicere  Deo  frivolum  est,  quia  hoc  modo  gravius  nobis  iudicium  accersamus.  Et  tamen  hoc  se  praetextu  adeo  inebriant  multi  homines,  ut  omni  exceptione  maiorem  esse  putent,  nec  quidquam  praeterea  audire  velint.  Multum  quidem  venerationis  habet  antiquitas:  sed  nemini  tanti  esse  debet,  ut  de  honore  Dei  quidquam  imminuat.  Insignis  est  hic  locus  ad  convincendos  eos  qui  annorum  multitudine  superstitiones  tueri  volunt:  quasi  inveteratus  error  pro  lege  habendus  sit.  8.  (Sic  dicit)  Hic  temperat  propheta  superiorem  sententiam.  Nam  valde  alioqui  durum  erat  sic  in  memoriam  reduci  patrum  iniquitates,  ut  Dominus  patres  et  filios  simul  perderet:  atque  tantum  horroris  haec  incutere  poterant  fidelibus,  ut  de  salute  sua  omnino  actum  esse  existimarent.  Sedulo  igitur  nobis  cavendum  est,  et  animadvertenda  ratio,  cur  nobis  Dominus  irascatur.  Sic  enim  nos  terrere  vult,  ut  ad  se  adducat,  non  ut  in  desperationem  coniiciat.  Ideo  fidelibus  spem  affert,  ne  abiiciant  animos,  et  adhibito  solatio  ad  resipiscentiam  animat.  Similitudine  id  confirmat.  Quemadmodum  si  quis  vitem  sibi  incommodam  vel  damnosam  eradicare  statuit,  ac  fructuosum  palmitem  reperiens  ei  parcet:  ita  se  continebit  Dominus  ne  evellat  eos  in  quibus  aliquid  reperiet  vigoris  aut  saporis.  Prius  conquerebatur  inutilem  esse  populum,  imo  vero  acerbos  fructus  edere.  Eandem  similitudinem  retinet  Isaias:  sed  aliter  eam  accommodat.  Tametsi  populus  sit  velut  vitis  infrugifera  et  degener,  tamen  reliquos  esse  quosdam  palmites  fructuosos,  quos  Dominus  perire  non  sinet.  Sed  hoc  bifariam  accipi  potest,  vel  quod  Dominus  servabit  populum  suum  propter  electos  :  vel  quod  perditis  reprobis  pios  ab  interitu  vindicabit.  Inter  has  duas  interpretationes  magna  est  differentia.  Quod  ad  primam  attinet,  scimus  interdum  parci  impiis  propter  pios,  quos  Deus  perdere  eodemque  iudicio  involvere  non  vult:  quemadmodum  varia  scripturae  exempla  satis  ostendunt.  Dominus  pepercisset  Sodomae,  si  vel  decem  tantum  bonos  viros  in  ea  reperisset.  Omnes  qui  cum  Paulo  navigabant,  numero  276,  ipsi  dati  sunt  a  Deo  atque  e  naufragio  erepti:  quo  magis  conspicua  esset  virtus  quam  in  servo  suo  edebat.  Domui  Putifaris  benedixit  Dominus,  prosperaque  omnia  concessit  propter  Iosephum,  qui  in  familia  illius  erat.  Sunt  et  alia  eiusmodi  exempla,  quae  per  se  quisque  facile  colliget.  Sed  alteram  interpretationem  magis  probo,  Dominum  sic  ulturum  scelera  populi  sui,  ut  tamen  habeat  suorum  ratio-  27*