32:422  gregariis.  Quid  enim  promitterent  pauperculi,  et  alienae  opis  indigi?  Magnates  vero  et  opulenti  fallaciter  nos  suo  splendore  illectant,  quasi  nihil  melius  sit  quam  latere  sub  eorum  umbra.  Quia  vero  ad  eorum  fortunam  obstupescunt  simplices,  adiungit,  potentissimum  quemque  ex  mundi  principibus  esse  tamen  filium  hominis.  Quo  satis  stultitia  nostra  coarguitur,  dum  eos  colimus  quasi  semideos:  sicuti  etiam  loquitur  Iesaias,  31,  3:  Aegyptius  homo  est,  et  non  Deus:  caro,  et  non  spiritus.  Utcunque  ergo  viribus,  pecunia,  hominum  manu,  aliisque  subsidiis  instructi  sint  principes:  admonet  tamen  David,  perperam  in  homine  mortali  et  caduco  locari  nostram  fiduciam,  et  stulte  salutem  quaeri  ubi  non  reperietur.  Quod  ipsum  melius  explicat  proximo  versu,  ubi  memorat  quam  brevis  et  fluxa  sit  hominum  vita.  Etsi  enim  laxat  Deus  fraenum  principibus,  ut  quidvis  machinando  coelum  quoque  invadant:  migratio  tamen  animae,  quasi  flatus  aliquis  transiret,  consilia  omnia  et  conatus  repente  evertit.  Quia  animae  domicilium  est  corpus,  non  male  de  ea  intelligi  poterit  quod  hic  dicitur:  morte  enim  illam  ad  se  Deus  revocat.  Simplicius  tamen  exponere  licebit  de  flatu  vitali:  et  contextui  melius  quadrabit,  simulac  spirare  desierit  homo,  cadaver  fore  putredini  obnoxium.  Unde  sequitur,  pendere  ab  evanido  flatu  quicunque  in  hominibus  confidunt.  Et  quum  dicit  cogitationes  omnes  in  illo  die  transire  j  vel  praeterfluere,  facete  hoc  verbo  perstringit  vesaniam  principum,  quibus  nullus  finis  vel  modus  est  sperandi  et  appetendi,  ut  coelum  ipsum  non  secus  ac  montibus  coacervatis  transscendant,  sicuti  phreneticus  ille  Alexander  Macedo,  quum  audiret  plures  esse  mundos,  deflevit  se  nondum  uno  potitum  esse,  paulo  post  autem  sarcophago  contentus  fuit.  Et  experientia  ipsa  demonstrat  ingentes  esse  labyrinthos  principum  consilia.  Ergo  ne  spes  nostrae  perperam  illis  implicentur,  pronuntiat  David,  in  principibus  quoque  celerem  et  momentaneum  fore  vitae  transitum,  cum  qua  simul  omnia  eorum  consilia  evanescent.  5.  (Beatus.)  Quia  non  satis  fuisset  vitium  reprehendere,  remedium  subiicit  unde  pendet  vera  correctio:  nempe  tunc  demum  firmam  et  bene  fundatam  esse  spem  hominis,  ubi  soli  Deo  innititur.  Huc  usque  enim  perveniunt  interdum  profani  homines,  ut  desipere  agnoscant  quisquis  spem  in  carne  locat.  Ideoque  saepe  sibi  succensent,  quod  tam  inconsiderato  salutem  exspectaverint  ab  hominibus:  sed  interea  omisso  *  remedio,  se  ab  errore  non  explicant.  Propheta  igitur,  damnata  vanitate,  quam  omnibus  ingenitam  esse  diximus,  prudenter  attexit,  beatos  esse  qui  Deo  confidunt.  Eundem  ordinem  tenet  Ieremias  capito  17,  5.  7:  Maledictus  qui  confidit  in  homine,  et  ponit  carnem  brachium  suum,  ete.  Deinde,  Beatus  vir  cuius  fiducia  est  Iehova.  27*