5:421  EPINICION  CHRISTO  CANTATUM  AB  IOANNE  CALVINO  CALENDIS  IANUAK1I  ANNO  M.  D.  XLI.  IO.  CALVINUS  LECTORI.  Quum  nuper  ex  nundinis  Lugdunensibus  reversi  nostri  mercatores  edictum  attulissent  monachi  cuiusdam  inquisitoris,  Tolosanae  curiae  decreto  confirmatum:  in  quo  phreneticus  ille,  pro  solenni  suorum  more  pios  omnes  libros  damnabat:  miratus  sum,  quum  versus  quoque  meos  (sic  enim  nominabat)  recenseri  in  eo  catalogo  vidi.  Luseram,  animi  gratia,  ante  annos  quatuor,  quum  essem  Vormatiae,  breve  carmen:  quod  quum  paucis  amicis  legendum  familiariter  dedissem,  tria  omnino,  quod  sciam,  aut  ad  summum  quatuor  exemplaria  exscripta  tunc  fuerant:  quae  postea  quantum  ex  edicto  coniicio,  latius  manarunt.  Nam  alioqui  sepultum  putassem,  quod  inter  meas  chartas  neglectum  iacebat:  ut  affirmare  ausim,  non  esse  iu  hac  urbe  duos,  qui  antehac  legerint,  me  conscio.  Nec  certe  aliud  habebam  consilii,  nisi  ut  supprimeretur  penitus.  Sed  quia  furiosus  hic  monachus,  et  nihilo  sanior  curia  Tolosana,  dum  eius  lectionem  interdicere  volunt,  faciunt  ut  vulgo  innotescat,  me  aliquod  scripsisse  carmen,  de  quo,  quodnam  et  quale  sit,  alii  atque  alii  subinde  a  me  quaerant:  edere  statim  malui,  quo  et  bonos  viros  quaerendi  molestia,  et  me  respondendi,  sublevarem.  Simul  stolidum  hunc  monachum,  eiusque  similes  commonefacere  volui,  quid,  ita  adversum  nos  insaniendo,  proficiant.  Nempe  hoc  consequuntur  sua  importunitate,  ut  ipsis  invitis  ac  crepantibus,  in  lucem  veniant  multa  quae  alioqui  forsan  laterent.