25:421  421-422  ARGUMENTUM.  De  autore  libri  huius  praestat  iudicium  suspendere,  quam  temere  quidquam  affirmare  de  re  incerta.  Qui  existimant  fuisse  Iosue,  quia  inscribitur  eius  nomen,  nituntur  levi  et  infirma  ratione.  Nam  et  sacrae  historiae  impositum  fuit  Samuelis  nomen,  ubi  tamen  contexitur  eorum  narratio,  quae  sequuta  sunt  eius  mortem.  Et  certe  liber  ordine  proximus  non  ideo  vocatur  Iudicum,  quod  fuerit  ab  ipsis  conscriptus  sed  quia  res  eorum  gestas  commemoret.  Iam  vero  quae  de  expugnatione  Hebron  et  Debir  narratur  historia  cap.  15  posterior  est  eius  morte.  Magis  probabilis  coniectura  est,  ab  Eleazar  summo  sacerdote,  collectas  fuisse  rerum  summas,  ex  quibus  volumen  hoc  fuit  confectum.  Propriae  enim  erant  eius  partes,  non  modo  viva  voce  aetatis  suae  populum  docere:  sed  testatam  quoque  ad  posteros  facere  Dei  gratiam  in  ecclesia  conservanda,  ut  vera  religio  melius  propagaretur.  Et  antequam  degenerassent  Levitae,  fuerunt  ex  illo  ordine  actuarii,  qui  in  perpetua  monumenta  referrent  quidquid  memoratu  dignum  erat  in  ecclesiae  gubernatione.  Verum  quod  nobis  compertum  non  est,  neque  adeo  cognitu  necessarium,  in  medio  relinquere  ne  pigeat:  modo  quod  praecipuum  est  nobis  constet,  doctrinam  quae  hic  comprehenditur,  a  spiritu  sancto  in  usum  nostrum  esse  dictatam,  ex  qua  non  vulgaris  fructus  percipi  ab  attentis  lectoribus  potest.  Quamvis  enim  populus  insignes  victorias  iam  adeptus,  in  regione  satis  commoda  et  mediocriter  fertili  habitaret:  suspensa  tamen  adhuc  manebat  Dei  promissio,  quoad  terram  Chanaan.  Imo  praecipuum  foederis  caput  effectu  adhuc  carebat:  ac  si  Deus  coniecto  in  retractum  angulum  populo,  opus  suum  deseruisset  mutilum  ac  deforme.  Hic  ergo  liber  demonstrat,  quum  intolerabilis  populi  impietas  cursum  abrupisset  liberationis,  Deum  tamen  in  poenis  exigendis  sic  temperasse  iudicii  rigorem,  ut  praestiterit  tandem  nihilominus  quod  pollicitus  fuerat  de  haereditate  terrae  Chanaan.  Ubi  etiam  occurrit  apprime  utilis  consideratio:  quamvis  homines  morte  abrepti  deficiant  in  medio  cursu,  Dei  fidem  nunquam  intercidere.  Ex  Mosis  interitu  impendebat  tristis  conversio.  Relictus  erat  populus  tanquam  corpus  suo  capite  truncatum.  In  hoc  dissipationis  metu  non  tantum  apparuit  immortalis  Dei  veritas,  sed  in  persona  Iosue  tanquam  in  illustri  speculo  patefactum  fuit,  ubi  aufert  Deus  e  medio  quos  singularibus  donis  ornavit,  in  manu  eius  esse  alios  quos  substituat:  neque  si  ad  tempus  vult  quosdam  excellere,  ipsis  alligatam  esse  eius  virtutem,  quin  reperiat  quoties  visum  fuerit  successores,  imo  suscitet  ex  lapidibus  qui  ad  praeclaras  res  gerendas  sint  idonei.  Principio  quum  traiectus  maris  rubri  quadraginta  annis,  quibus  Deus  populum  circumduxerat  in  deserto,  fere  obsolevisset:  eodem  miraculo  in  Iordane  edito  continuus  liberationis  tenor  de  integro  sancitus  fuit.  Circumcisio  vero  renovata  perinde  valuit,  ac  si  foedus  suum  Deus  foeda  populi  incuria  obrutum  vel  desperatione  abiectum  rursus  stabiliret.  Sequitur,  quomodo  Dei  manu  in  possessionem  terrae  promissae  deducti  fuerunt.  Primae  urbis  expugnatio  arrha  fuit  perpetuae  quam  sperare  debebant  Dei  virtutis,  dum  solo  tubarum  clangore  quatefacti  muri  Iericho  sponte  corruerunt.  Neque  tamen  uno  proelio  aut  exigui  temporis  militia  profligatae  fuerunt  gentes:  sed  paulatim  multis  laboriosis  certaminibus  27*