55:420  supra  legem  Dei,  iam  eximis  te  a  legis  subiectione.  Ergo  qui  fratrem  temere  iudicat,  excudit  Dei  iugum:  quia  communi  vivendi  regulae  se  non  submittit.  Est  igitur  argumentum  a  contrariis:  quia  legis  observatio  multum  ab  hac  arrogantia  dissideat,  quum  homines  stultae  suae  opinioni  legis  vim  ac  autoritatem  tribuunt.  Unde  sequitur,  tunc  nos  legem  observare  quum  toti  a  sola  eius  doctrina  pendemus,  nec  aliunde  discernimus  inter  bonum  et  malum,  sicuti  etiam  omnia  hominum  facta  et  dicta  exigi  debent.  Si  quis  obiiciat,  sanctos  tamen  fore  mundi  iudices:  facilis  est  responsio,  non  competere  in  eos  eiusmodi  honorem  proprio  iure:  sed  quatenus  sunt  Christi  membra.  Quod  autem  nunc  iudicant  secundum  legem,  in  eo  non  sunt  existimandi  iudices:  quia  Deo  tantum  suo  et  omnium  iudici  obedienter  subscribunt.  Quantum  ad  Deum  spectat,  legis  factor  censeri  non  debet:  quoniam  eius  iustitia  lege  est  superior.  Fluit  enim  lex  ex  aeterna  immensaque  Dei  iustitia,  tanquam  ex  fonte  rivulus.  12.  Unus  legislator.  Quum  servandi  perdendique  potestatem  cum  legislatoris  officio  coniungit,  significat,  totam  Dei  maiestatem  ad  se  rapere  eos  qui  sibi  ius  ferandae  legis  vindicant.  Atqui  tales  sunt  qui  suum  nutum  aliis  ingerunt  pro  lege.  Meminerimus  autem  non  de  externa  politia  hic  agi,  in  qua  locum  habent  magistratuum  edicta  aut  leges:  sed  de  spirituali  animae  regimine,  in  quo  solum  Dei  verbum  dominari  convenit.  Unus  ergo  Deus  est  qui  suis  legibus  conscientias  iure  subiectas  habet:  quemadmodum  solus  animae  salutem  vel  interitum  habet  in  manu  sua.  Hinc  constat  quid  de  humanis  praeceptis  sentiendum  sit,  quae  conscientiis  laqueum  necessitatis  iniiciunt.  Modestiam  in  nobis  quidam  desiderant  quum  papam  vocamus  Antichristum,  qui  tyrannidem  in  animas  exercet,  se  legislatorem  faciens  Deo  aequalem.  Atqui  ex  hoc  loco  longe  plus  colligimus:  Antichristi  scilicet  membra  esse  qui  tales  laqueos  sponte  induunt:  et  Christo  eatenus  renuntiare  dum  illi  non  hominem  tantum  mortalem,  sed  qui  se  adversus  eum  extollit,  associant.  Est  inquam  praevaricatrix  obedientia,  et  quae  diabolo  exhibetur,  dum  alium  admittimus  ad  regendas  animas  legislatorem  quam  Deum.  Tu  quis  es.  Putant  quidam  admoneri  hic  suorum  vitiorum  reprehensores,  ut  inchoent  a  se  ipsis  examen:  ac  dum  reputant  se  nihilo  esse  aliis  puriores,  tam  severi  esse  desinant.  Ego  simpliciter  suam  hominibus  conditionem  obiici  puto,  ut  cogitent  quantum  absint  ab  eo  gradu  in  quem  se  evehunt.  Quemadmodum  etiam  Paulus  loquitur:  Tu  quis  es  qui  alienum  servum  iudicas  (Rom.  14,  4)?  13.  Age  nunc,  qui  dicitis,  Hodie  et  cras  eamus  in  civitatem,  et  transigamus  illic  annum  unum,  et  mercemur,  et  lucremur:  14.  qui  nescitis  quid  cras  futurum  sitr