47:420  Christus  obtulit.  Atqui  facilis  est  refutatio:  quod  nullum  offerendi  mandatum  ipsi  habeant:  deinde,  quod  Christus  semel  una  oblatione  defunctus  pronuntiet  ex  cruce,  totum  esse  perfectum.  Ergo  plus  quam  falsarii  sunt,  qui  testamentum  sacro  filii  Dei  sanguine  obsignatum  perfide  corrumpunt  ac  violant.  Emisit  spiritum.  Omnes  evangelistae  diligenter  mortem  Christi  exprimunt,  nec  immerito:  nam  hinc  nobis  vitae  fiducia,  hinc  etiam  secura  adversus  mortem  gloriatio,  quod  eam  vice  nostra  obiit  Dei  filius  et  cum  ea  luctando  superior  evasit.  Notanda  autem  est  loquutio  quam  usurpat  Ioannes,  qua  docemur,  pios  omnes,  qui  cum  Christo  moriuntur,  secure  animas  suas  deponere  in  Dei  custodiam,  qui  fidelis  est,  nec  perire  sinet  quod  servandum  susceperit.  Hoc  inter  filios  Dei  et  reprobos  discrimen  est  moriendi,  quod  hi  animas  temere  exhalant,  illi  autem  Dei  tutelae  committunt,  quasi  pretiosum  depositum,  cuius  fidus  erit  custos  usque  in  diem  resurrectionis.  Nomen  spiritus  hic  pro  anima  immortali  accipitur,  quemadmodum  satis  patet.  31.  Iudaei  ergo,  (ut  non  manerent  sabbato  corpora  in  cruce,  quia  parasceue  erat,  et  erat  magnus  dies  illius  sabbati)  rogarunt  Pilatum,  ut  frangerentur  eorum  crura  et  tollerentur.  32.  Venerunt  ergo  milites,  et  primi  quidem  fregerunt  crura,  et  alterius,  qui  crucifixus  erat  cum  eo.  33.  Quum  autem  ad  Iesum  venissent,  postquam  viderunt  eum  iam  mortuum,  non  fregerunt  eius  crura.  34.  Sed  unus  militum  lancea  eius  latus  aperuit,  et  continuo  exivit  sanguis  et  aqua.  35.  Et  qui  vidit,  testimonium  reddidit,  et  verum  est  eius  testimonium,  et  ille  novit  quod  vera  dicit,  ut  vos  credatis.  36.  Haec  autem  facta  sunt,  ut  scriptura  impleretur:  Os  non  comminuetis  eius.  31.  Et  iterum  alia  scriptura  dicit:  Videbunt,  in  quem  transfixerunt.  31.  Quia  parasceue  erat.  Haec  quoque  narratio  ad  fidem  aedificandam  valet.  Primum  quia  ostendit,  impletum  fuisse  in  Christi  persona  quod  in  scripturis  praedictum  erat  (Zach.  12,  10):  deinde,  quia  mysterium  continet  non  vulgaris  momenti.  Dicit  evangelista  Iudaeos  rogasse  ut  corpora  tollerentur  e  crucibus.  Mandatum  id  quidem  fuerat  lege  Dei,  sed  Iudaei,  ut  solent  hypocritae,  rebus  minutis  tantum  intenti  sine  ullo  scrupulo  maxima  scelera  praetereunt.  Nam  ut  sabbatum  suum  religiose  celebrent,  de  externa  pollutione  anxii  sunt.  Interea  non  reputant  quam  nefandum  fuerit  scelus,  vita  privare  hominem  innoxium.  Sic  paulo  ante  vidimus,  non  ingressos  fuisse  praetorium  ne  se  polluerent,  quum  totam  regionem  pollueret  eorum  impietas.  Interea  per  eos  exsequitur  Dominus,  quod  salutis  nostrae  plurimum  intererat,  ut  mirabiliter  intactum  maneat  Christi  corpus,  et  ex  eius  latere  fluant  sanguis  et  aqua.