37:420  testari  oportebat  quantum  a  pollutione  gentium  alieni  essent.  Ab  ea  ergo  regula,  quam  nobis  Dominus  praescribit,  ne  latum  quidem  unguem  discedendum  est.  5.  (Qui  dicunt.)  Extremam  impietatem  notat  in  Iudaeis,  quod  indomitos  se  et  contumaces  opponerent  Dei  cultoribus,  nec  ullis  monitionibus  parere  vellent.  Est  enim  aliqua  spes  resipiscentiae  quamdiu  monitis  et  reprehensionibus  locum  damus  :  quod  si  eas  respuamus,  desperatos  nos  esse  certissimum  est.  Etsi  autem  verba  in  speciem  obscura  sunt,  summa  huc  redit,  morose  et  ferociter  hypocritas  repellere  pios  monitores:  quia  vel  sibi  falsam  sanctitatem  arrogent,  vel  prae  superbia  non  sustineant  reprehendi.  Nunquam  enim  hypocrisis  moroso  fastidio  et  superbia  vacat.  Ne  miremur  ergo  eos  qui  hoc  vitio  laborant  insolenter  sese  efferre,  ac  iactare  virtutem  et  sanctitatem  suam,  aliisque  omnibus  sese  praeferre  :  nosque  idem  experiri  in  nostri  temporis  hypocritis,  quod  Isaias  de  suis  praedicabat.  Nam  eos  excaecavit  Satan,  ut  inani  magniloquentia  iactantes  suam  quam  vocant  devotionem  verbum  Dei  vilipenderent.  Existimant  interpretes  generalem  hic  esse  sententiam,  qua  reprehenduntur  Iudaei,  quod  se  prophetis  subiicere  nollent  :  sed  videtur  mihi  consideranda  circumstantia,  quam  non  satis  perpendunt:  quod  continua  serie  haec  superioribus  coniungantur,  atque  vehementer  reprehendantur  Iudaei,  quod  non  solum  desciverint  a  vero  cultu,  sed  etiam  pervicaciter  figmenta  sua  sequuti  sint,  ut  facessere  iuberent  quisquis  non  applauderet.  Nam  istud  Mane  apud  te,  nihil  aliud  est  quam  apage,  quasi  negarent  quidquam  sibi  negotii  esse  cum  probis  monitoribus.  6.  (Ecce  scriptum  est.)  Alludit  ad  communem  iudicum  morem,  apud  quos  scriptae  sunt  alicuius  rei  inquisitiones,  testimonia,  acta  et  eiusmodi,  ut  quum  iis  uti  opus  erit,  facile  reus  convincatur.  Nam  scribimus  ea  quorum  in  posterum  memoriam  exstare  cupimus.  Testatur  ergo  Dominus  haec  nulla  oblivione  deleri  posse,  quoniam  scripta  sunt.  Quamvis  enim  ad  tempus  dissimulet,  tamen  non  impune  evadent  impii,  sed  iustum  tandem  iudicem  esse  sentient.  Hinc  colligendum  est  non  esse  abutendum  patientia  Dei,  quod  diu  nos  tolerat,  nec  statim  exserit  manum  ad  nos  puniendos:  quia  nihilominus  apud  ipsum  descripta  sunt  omnia,  quorum  tandem  poenas  nos  dare  necesse  erit,  nisi  resipiscamus.  Dominus  quidem  scriptura,  quasi  subsidio  memoriae,  non  eget:  sed  hac  loquendi  forma  utitur,  ne  quid  eum  oblitum  esse  existimemus  quum  tardius  iudicia  sua  exsequitur.  Imo  apud  Ieremiam  (Iere.  17,  1)  expressius  loquitur,  Peccatum  Iehudah  scriptum  esse  stylo  ferreo  in  ungue  adamantino.  Haec  loquutio,  rependere  in  sinum,  satis  usitata  est  scripturis:  quoniam  homines  pec-