32:420  verbo  suo  probat  et  concedit.  Quod  additur  de  clamore,  species  est  correctionis.  Neque  enim  tam  facilis  semper  apparet  Deus,  ut  quod  rogatus  est,  eodem  momento  praestet.  Ideoque  perseverantia  opus  est  in'hoc  fidei  examine,  ut  vota  confirmet  clamor.  Postrema  etiam  particula,  servabit  eos,  vice  correctionis  posita  est:  ut  sciamus  quatenus,  et  in  quem  finem  impleat  Deus  suorum  vota,  nempe  ut  re  ipsa  pateat  fidum  esse  salutis  eorum  custodem.  20.  (Custodit  Iehova.)  Eandem  doctrinam  prosequitur,  Deum  servis  suis  propinquum  esse,  ut  in  necessitate  opem  ferat:  quia  hic  certus  est  effectus  praesentiae  Dei,  quidquid  accidat  discriminum,  salvos  tamen  et  incolumes  eius  gratia  semper  evadere.  Quod  vero  timoris  loco  nunc  dilectionem  ponit,  notatu  dignum  est:  hoc  enim  epitheto  fideles  insigniens,  quod  Deum  diligant,  radicem  verae  pietatis  esse  ostendit,  voluntario  affectu  se  Deo  subiicere:)  quod  ipsum  ex  fide  nascitur.  Donec  enim  gratiae  suae  dulcedine  nos  Deus  traxerit,  nunquam  sequetur  placida  haec  submissio.  Quanquam  forte  istud  diligere,  de  quo  loquitur  David,  longius  patet:  quia  non  modo  se  Deo  addicunt  fideles,  ut  imperio  pareant,  sed  quia  sciunt  nihil  esse  optabilius  quam  ei  coniungi,  ad  hanc  felicitatem  toto  animo  adspirant.  Interea  tamen  dubium  non  est,  verae  sanctitatis  et  iustitiae  praecipuum  caput  hic  notari,  sicuti  et  apud  Mosen  Deut.  10,  12:  Et  nunc  Israel  quid  abs  te  petit  Dominus  Deus  tuus,  nisi  ut  ipsum  diligas,  ete?  Hunc  vero  pietatis,  fructum,  quod  tuti  salvique  manemus  sub  Dei  custodia,  contrario  membro  David  amplificat:  pronuntians  iusta  Dei  vindicta  male  perituros  omnes  impios.  Tandem  ut  primis  ultima  respondeant,  iterum  affirmat  se  laudum  Dei  fore  praeconem,  et  omnes  suo  exemplo  ad  hoc  idem  officium  hortatur.  Nam  quod  vertunt  aliqui,  Omnis  animans  benedicet:  mihi  non  probatur.  Quum  Moses  de  diluvio  loquens,  omnem  carnem  in  qua  erat  spiritus  vitae  interiise  dicit,  fateor  sub  hac  voce  comprehendi  bruta  animalia:  verum  ubicunque  sine  adiectione  ponitur  caro,  nonnisi  ad  homines  refertur.  Neque  tamen  hic  David  quid  facturi  sint  praedicat,  sed  quid  facere  debeant:  ac  si  diceret,  immensa  et  inexhausta  Dei  bonitate  obstrictos  teneri  cunctos  mortales  ad  Deum  assidue  et  iugiter  laudandum.