54:42  tous  ceux  qui  ont  adhere  a  leur  doctrine:  Ho,  tu  vois  comme  il  en  est.  Timothee  pouvoit  estre  comme  esbranle.  Pour  ceste  cause  sainct  Paul  luy  dit,  Encores  que  ie  soye  en  opprobre  au  monde,  que  les  uns  se  mocquent  de  moy,  les  autres  me  tienent  comme  detestable,  si  est-ce  qu'il  ne  te  faut  point  estre  esmeu  de  tout  cela:  car  ie  suis  prisonnier  de  Iesus  Christ:  comme  s'il  disoit,  Que  le  monde  me  face  tous  les  vituperes  qu'il  luy  sera  possible,  ce  n'est  point  pour  mes  offenses,  Dieu  advoue  ma  cause:  et  aussi  de  faict  elle  est  siene,  ie  n'endure  point  pour  mes  malefices,  i'ay  tousiours  sa  verite  de  ma  part.  D'autant  donc  que  la  cause  de  mes  persecutions  n'est  sinon  que  i'ay  maintenu  la  parole  de  Dieu,  et  la  maintien,  il  ne  faut  point  que  tu  t'arrestes  a  ce  que  le  monde  iuge,  car  les  hommes  sont  menez  d'affections  perverses:  qu'il  te  suffise  donc  que  ie  suis  comme  en  ostage  pour  le  Fils  de  Dieu,  et  qu'il  magnifie  ma  prison,  en  sorte  que  si  elle  est  en  opprobre  quant  au  monde,  elle  ne  laisse  pas  d'estre  en  honneur  et  en  dignite  devant  Dieu,  et  devant  ses  anges.  Apprenons  donc  de  ne  point  frauder  Iesus  Christ  du  tesmoignage  que  nous  luy  devons,  ayans  la  bouche  close  quand  il  sera  besoin  de  maintenir  son  honneur  et  l'authorite  de  son  Evangile:  mais  aussi  quand  nous  verrons  nos  freres  estre  en  affliction  pour  le  nom  de  Dieu,  que  nous  soyons  conioints  avec  eux,  et  que  nous  bataillions  entant  qu'en  nous  sera  pour  ceste  querelle,  que  nous  ne  soyons  point  esbranlez  voyans  toutes  les  tempestes  qui  s'esmeuvent,  mais  que  nous  tenions  bon,  nonobstant  que  le  diable  ait  la  bride  avallee,  et  que  les  choses  soyent  confuses  tant  et  plus,  que  nous  demeurions  tousiours  constans  en  nostre  propos,  quand  il  faut  estre  tesmoins  du  Fils  de  Dieu,  puis  qu'il  nous  fait  ceste  grace  de  se  servir  de  nous  en  une  chose  si  digne.  Et  cependant  regardons  bien  si  les  hommes  endurent  pour  leurs  pechez,  ou  pour  la  verite  de  Dieu:  gardons  quand  nous  voyons  quelqu'un  estre  opprime,  de  le  mespriser  pour  cela,  car  il  ne  nous  faut  point  estre  temeraires  en  cest  endroit,  autrement  l'iniure  s'addresser  a  Dieu.  Il  faut  donc  que  nous  enquerions  diligemment  pour  quelle  cause  les  hommes  souffrent.  Si