51:42  suiets  a  la  Loy.  Or  il  est  vray  qu'ici  il  donne  courage  a  tous  fideles,  d'autant  qu'ils  sentiront  l'infirmite  en  eux,,  iusques  a  ce  qu'ils  ayent  despouille  leur  corps  mortel.  Mais  quoy  qu'il  en  soit,  voyans  que  Dieu  les  supporte,  et  qu'il  ne  laisse  pas  d'avoir  leur  service  agreable,  encores  qu'ils  ne  soyent  point  reformez  du  tout,  et  en  perfection,  voila  comment  ils  peuvent  persister,  et  autrement  ils  seroyent  en  trouble  et  tomberoyent  en  desespoir.  Sainct  Paul  donc  nous  a  ici  voulu  exhorter  a  constance,  disant  que  si  nous  sommes  gouvernez  par  l'Esprit  de  Dieu,  que  nous  ne  sommes  plus  suiets  a  la  Loy.  Mais  cependant  aussi  il  s'est  moque  obliquement  de  ceux  contre  lesquels  il  dispute,  (comme  desia  nous  avons  veu  ce  matin),  car  ils  n'avoyent  que  des  fanfares  pour  leurs  vertus.  Comme  auiourd'huy  en  la  Papaute  quand  on  parlera  de  sainctete  et  du  service  de  Dieu,  il  n'est  question  que  de  faire  beaucoup  d'agios  et  beaucoup  de  ceremonies,  c'est  a  dire  de  menus  fatras.  Et  quand  un  Papiste  aura  barbote,  qu'il  aura  salue  un  marmouset,  et  qu'il  trottera  puis  apres  a  l'autre,  que  les  bigottes  auront  allume  leurs  chandeles,  et  puis  qu'on  aura  prins  beaucoup  d'asperges  d'eau  benite,  et  qu'on  aura  fait  beaucoup  de  croix  et  a  tors  et  a  travers,  qu'ils  auront  bien  garde  le  caresme  :  quand  ils  se  seront  ainsi  empeschez  pour  se  racheter,  ou  par  messes,  ou  par  autres  abominations:  voila  comme  Dieu  sera  servi  et  honore.  Et  puis  s'il  y  a  un  beau  luminaire,  et  que  les  orgues  sonnent  bien,  et  qu'on  voye  la  beaucoup  de  parades,  que  les  marmousets  soyent  bien  dorez,  qu'on  leur  face  du  perfum,  qu'on  les  appaise  en  beaucoup  d'autres  telles  sottises,  voila  toute  la  perfection  des  Papistes  en  ce  qui  n'est  que  mensonge:  ce  sont  des  badinages,  voire  des  abominations,  combien  qu'ils  les  estiment  grandes  vertus.  Or  de  nostre  coste  nous  disons  que  le  service  de  Dieu  est  spirituel,  et  qu'il  ne  regarde  point  ce  qui  est  apparent  devant  les  hommes:  mais  qu'il  demande  une  droite  integrite  et  rondeur  de  coeur:  comme  il  en  est  parle  au  5.  chap.  de  Ieremie.  Or  au  contraire  les  hommes  se  persuadent  qu'ils  contenteront  Dieu  a  leur  facon  et  a  leur  guise,  et  pour  ceste  cause  ils  le  transfigurent  et  imaginent  qu'il  est  du  tout  semblable  a  eux  pour  s'accorder  a  leurs  appetis  :  et  il  ne  s'en  faut  point  esbahir  :  car  combien  qu'ils  disent  avoir  este  enseignez  en  la  Loy,  si  est-ce  qu'ils  n'y  estudient  point  et  ne  scavent  ce  qu'elle  contient.  Apprenons  donc  quand  nous  voudrons  nous  addonner  au  service  de  Dieu,  de  ne  point  nous  amuser  a  ce  que  bon  nous  semble,  et  a  nos  intentions  (qu'on  appelle)  qui  ne  sont  que  tromperies  de  Satan  :  mais  regardons  ce  que  Dieu  commande,  et  a  quoy  ii  nous  veut  exercer:  quelles  sont  nos