48:42  sed  ut  suis  vivat.  Nunc  videmus  quo  tendat  consilium  Petri,  non  debere  videri  novum,  quod  ita  multo  ante  praedictum  fuerat,  Iesum  quoque  esse  Christum  :  quia  de  eo,  tanquam  ecclesiae  capite,  vaticinatus  fuerit  David.  Principio  videndum  est,  an  omnino  de  Christo  intelligi  debeat  hic  locus,  quemadmodum  Petrus  contendit:  deinde,  si  quid  erit  in  verbis  notatu  dignum,  excutiemus  suo  ordine.  Negat  Petrus  competere  in  Davidem,  quod  hic  dicitur  (Psal.  16,  8):  non  permittes  ut  sanctus  tuus  corruptionem  videat:  quia  Davidis  cadaver  in  sepulcro  corruptum  fuerit.  Videtur  in  speciem  leve  esse  argumentum.  Promptum  enim  esset  excipere,  non  urgendum  esse  verbum,  quum  nihil  aliud  voluerit  David  quam  se  ab  interitu  eximere.  Ergo  utcunque  eum  attigerit  corruptio,  id  tamen  non  obstat,  quominus  tutum  se  ab  eius  periculo  iure  praedicet:  quia  noverat  se  a  Domino  liberandum.  Imo  videtur  repetitio  esse  proximi  membri,  ex  familiari  linguae  hebraicae  usu.  Quod  si  ita  est,  simplex  erit  sensus:  Non  passurum  esse  Deum  ut  opprimatur  mortis  imperio,  vel  ut  eum  mors  absumat.  Atque  hanc  interpretationem  confirmat,  quod  ubi  infernum  legimus,  hebraice  habetur,  sheol:  ubi  legimus  corruptionem,  illic  est,  shachat.  Utraque  autem  vox  sepulcrum  significat:  Hoc  modo  bis  diceret  David,  se  a  morte  ereptum  per  Dei  gratiam.  Denique,  idem  hic  dicit,  quod  Psal.  49  (v.  16)  :  Redimet  Deus  animam  meam  e  manu  inferni.  Sicut  e  converso,  quum  de  reprobis  agit,  descensum  in  sepulcrum  pro  exitio  capere  solet.  Respondeo  breviter,  maius  hic  quiddam  exprimi  quam  communem  piorum  redemptionem.  David  quidem  aeternum  sibi  tam  in  vita  quam  in  morte  Deum  liberatorem  fore  promittit.  Neque  vero  multum  profuisset,  ereptum  semel  esse  ab  uno  periculo,  nisi  confisus  esset  Dei  protectione  se  usque  in  finem  fore  salvum:  sed  incolumitatem  designat  superiorem  communi  sorte.  Et  certe  verba  sonant  de  novo  et  singulari  privilegio  eum  gloriari.  Ut  concedam  repetitionem  esse,  atque  istis  duobus  membris  unum  dici:  Non  deseres  animam  meam  in  inferno  :  et  :  Non  permittes,  ut  videam  corruptionem  :  nego  tamen  simpliciter  intelligi,  quod  Deus  sanctum  suum  vindicare  ab  aeterno  interitu  velit.  Siquidem  nominatim  immunitas  a  corruptione  promittitur.  Nec  moror  quod  s  h  a  c  h  a  t  sepulcrum  significat,  sicuti  sheol  quod  priore  membro  positum  est.  Nam  ut  de  verbis  non  contendam,  etymologia  tamen  spectanda  est.  Quum  ergo  s  h  a  c  h  a  t  ideo  sepulcrum  vocetur,  quia  corpus  hominis  putredine  corrumpit,  non  dubium  est,  quin  illam  qualitatem  notare  voluerit  David.  Ergo  non  tam  locus  hoc  nomine  exprimitur,  quam  putrescendi  conditio.  Ita  sensus  est,  non  passurum  Deum,  ut  in  sepulcro  putrescat  ille,  de  quo  Psalmus  loquitur.  Quum  autein  ab  hae  necessitate  immunis  non  fuerit  David,