47:42  decus,  quod  nuptiale  convivium  non  modo  Christus  sua  praesentia  dignatus  est,  sed  primo  a  se  edito  miraculo  ornavit.  Exstant  vetusti  quidam  canones,  quibus  clerici  nuptias  adire  vetantur.  Causa  vetandi  fuit,  ne  lascivias  quae  illic  ut  plurimum  grassantur  spectando  earum  quodammodo  approbatores  essent.  At  vero  longe  praestitisset,  tantum  illuc  gravitatis  secum  afferre,  ut  licentiam  compescerent,  quam  sibi  in  latebris  indulgent  protervi  homines  ac  dissoluti.  Nobis  vero  potius  Christi  exemplum  sit  pro  lege:  nec  quidquam  putemus  utilius  esse  factu  quam  quod  eum  fecisse  legimus.  Manifestavit  gloriam.  Quia  tunc  scilicet  memorabile  et  gloriosum  specimen  edidit,  unde  filium  Dei  esse  constaret.  Quaecunque  enim  miracula  ostendit  mundo,  totidem  divinae  eius  potentiae  testimonia  fuerunt.  Tunc  autem  opportunum  illustrandae  eius  gloriae  tempus  advenerat,  quum  ex  patris  mandato  innotescere  vellet.  Unde  etiam  colligitur  miraculorum  finis.  Perinde  enim  valet  haec  loquutio,  ac  si  dictum  esset,  Christum,  ut  patefaceret  gloriam  suam,  miraculum  hoc  edidisse.  Quid  ergo  de  miraculis  sentiendum,  quae  gloriam  Christi  obscurant?  Crediderunt  in  eum  discipuli.  Si  discipuli  erant,  aliqua  fide  iam  imbutos  esse  oportuit.  Sed  quum  hactenus  non  certa  et  explicita  fide  eum  sequuti  essent,  tunc  demum  se  illi  addicere  coeperunt,  ut  Messiam  agnoscerent,  qualis  iam  illis  praedicatus  fuerat.  Magna  vero  Christi  indulgentia,  quod  pro  discipulis  habet,  in  quibus  tam  pusilla  est  fides.  Et  sane  haec  doctrina  generaliter  ad  nos  omnes  patet.  Nam  quae  adulta  nunc  est  fides,  infantiam  prius  suam  habuit,  imo  in  nemine  tam  perfecta  est,  quin  ad  unum  omnes  credendo  proficere  necesse  sit.  Ita  qui  iam  credebant,  quatenus  ad  scopum  maiores  quotidie  faciunt  progressus,  credere  incipiunt.  Ergo  qui  fidei  primitias  adepti  sunt,  semper  ad  profectum  contendant.  Fructus  etiam  miraculorum  hic  ostenditur,  nempe  quod  ad  confirmationem  profectumque  fidei  referri  debent.  Qui  alio  detorquet,  totum  eorum  usum  corrumpit  et  adulterat.  Sicuti  papistas  videmus  non  alium  in  finem  iactare  fictitia  sua  miracula,  nisi  ut  fidem  obruant,  et  a  Christo  mentes  avertant  ad  creaturas.  12.  Post  hoc  descendit  in  Capernaum  ipse  et  mater  eius,  et  fratres  eius,  et  discipuli  eius:  et  illic  mansit  non  multos  dies.  13.  Erat  autem  in  propinquo  pascha  Iudaeorum:  itaque  adscendit  Iesus  Hierosolymam.  14.  Et  invenit  in  templo  quosdam  qui  vendebant  boves,  et  oves,  et  columbas,  nummularios  item  sedentes.  15.  Et  facto  ex  funiculis  flagello,  omnes  e  templo  eiecit  cum  ovibus  et  bobus,  et  nummulariorum  effudit  pecuniam^  mensasque  evertit.  16.  Et  his  qui  columbas  vendebant  dixit:  Tollite  ista  hinc,  ne  faciatis