42:42  mais  quand  ce  Philometor  connoist  la  trahison  de  son  oncle,  lequel  estoit  venu  non  pas  avec  grosse  armee,  mais  avec  quelque  compagnie  de  gens  d'eslite  en  cette  province,  ou  il  n'y  avoit  point  de  garnison,  il  fait  tant  qu'il  chasse  dehors  tout  a  fin  qu'il  ne  soit  point  empesche  en  son  royaume,  comme  il  avoit  este  delibere  contre  luy.  La  dessus  donc  nous  voions  que  quand  un  homme  a  mal  commence,  qu'il  continue  tousiours  en  empirant,  iusques  a  ce  qu'il  soit  venu  au  comble  de  toute  iniquite,  et  d'autant  plus  devons  nous  estre  songneux,  de  ne  point  avancer  un  seul  pied  pour  attenter  chose  qui  soit  contre  nostre  vocation,  car  quand,  nous  aurons  delivre  tant  peu  que  ce  soit  Dieu  nous  laschera  la  bride,  et  alors  nous  ne  cesserons  de  nous  desborder,  iusques  a  ce  que  nous  commettions  de  telles  enormites,  qu'il  n'y  aura  plus  de  remede  en  nous.  Quand  nous  oions  ici  parler  du  roy  Antiochus  Epiphanes,  il  est  vray,  que  c'estoit  un  paien,  un  incredule,  mais  tant  y  ha  que  Dieu  nous  ha  propose  ces  mirouers  ici,  a  fin  que  nous  contemplans  la  que  c'est  des  hommes,  c'est  a  scavoir  que  depuis  qu'ils  ont  commence  a  laisser  le  droit  chemin,  qu'ils  s'en  alliennent  tousiours  de  plus  en  plus.  Que  faut  il  donc  (comme  i'ay  desia  dit)?  que  nous  cheminions  en  une  telle  modestie,  que  nul  de  nous  n'attente  rien,  qu'il  ne  s'avance  point  d'un  seul  pas,  sinon  d'autant  que  Dieu  luy  permet,  que  nous  connoissions  a  quoy  c'est  que  Dieu  nous  appele  pour  le  suivre,  sans  en  decliner  en  facon  que  ce  soit,  voila  ce  que  nous  avons  a  retenir  de  ce  passage.  Or  l'ange  adiouste  puis  apres,  que  ce  ne  sera  que  pour  un  temps,  combien  qu'il  face  des  choses,  que  ses  peres  ne  ses  ancestres  n'ont  point  faittes  (dit-il)  toutesfois  cela  ne  sera  que  pour  un  temps.  Or  quand  il  est  dit  qu'il  fera  plus  que  ses  peres,  c'est  d'autant  que  les  roys  de  Syrie  ne  d'Asie  n'avoient  iamais  peu  venir  a  bout  de  ce  royaume  d'Egypte,  car  si  nous  considerons  bien  toutes  les  histoires  depuis  la  mort  d'Alexandre  le  grand,  nous  trouverons  qu'entre  tous  ceux  qui  ont  succede  au  royaume  de  Syrie,  n'ont  point  eu  une  telle  entree  sur  le  royaume  d'Egypte,  comme  cettui-ci,  il  est  vray  qu'il  n'y  avoit  point  eu  de  roys  en  Egypte,  qui  aient  si  bien  maintenu  le  royaume  comme  Ptolomee,  le  premier  fils  de  Lagus,  tous  les  autres  ont  este  tellement  endormis  en  leurs  affaires,  qu'ils  ne  se  soucient  gueres  du  gouvernement  du  royaume,  et  mesmes  les  autres  capitaines  d'Alexandre  le  grand  se  sont  si  mal  gouvernes  aux  royaumes  et  provinces,  qu'ils  avoient  occupes,  qu'il  n'en  ont  pas  longuement  ioui,  mais  ce  Ptolomee  s'estoit  la  maintenu  comme  s'il  avoit  mis  une  barre  entre  luy  et  les  autres,  pour  dire  vous  ne  passeres  point  plus  outre,  tellement  que  les  roys  de  Syrie  n'avoient  iamais  gueres  gaigne  a  l'encontre  de  luy.  Or  l'ange  dit  ici  qu'Antiochus  Epiphanes  fera