41:42  confirmabimus  quae  nunc  leviter  percurro.  Sequitur,  5.  Et  ecce  bellua  (bestia)  posterior  altera  (hoc  est,  sequuta  est  secunda  bestia  primam  illam),  similis  urso  (inquit)  et  surrexit  ad  latus  unum:  et  tres  costae  in  ore  eius  inter  dentes  eius:  et  sic  dicebant  ei  (hoc  est,  sic  ei  fuit  dictum:  capitur  enim  hoc  verbum  indefinite),  Surge,  comede  carnem  multam.  Hic  propheta  concionatur,  ut  fuerat  edoctus  per  somnium,  de  secunda  bestia.  Minime  autem  dubium  est,  si  volumus  iudicium  facere  ex  eventu,  quin  bestia  haec  figuret  regnum  Persarum  et  Medorum:  quanquam  Persas  designat  propheta,  quia  Medi  cesserunt  paulo  post  sub  ipsorum  iugum.  Ecce,  inquit,  altera  bestia  similis  urso.  Scimus  ursum  esse  ignobile  et  foedum  animal,  segne  etiam  vel  ignavum,  et  tamen  plenum  truculentia.  Si  quis  itaque  ursum  comparet  cum  leone,  dicet  foedum  et  tristem  esse  conspectum  ursi,  quum  sit  speciosa  forma  in  leone,  quamvis  sit  formidabilis.  Comparat  igitur  urso  Persas,  propter  barbariem:  quoniam  fera  erat  gens  illa  et  immanis,  ut  dictum  fuit:  deinde  non  erant  spectabiles  Persae,  sicuti  Assyrii  et  Chaldaei  qui  habitabant  in  pulcherrima  totius  mundi  plaga,  et  in  regione  amoenissima,  quasi  in  theatro  nobilissimo:  Persae  autem  latuerant  sicuti  ferae  bestiae  in  suis  speluncis.  Erant  enim  inter  suos  montes,  et  illic  victitabant  non  secus  ac  bruta  animalia.  Hinc  fit,  ut  aptissime  propheta  comparet  eos  urso,  imo  Deus  speciem  hanc  obtulerit  prophetae.  Postea  addit  stetisse  ad  latus  unum.  Quidam  existimant  hoc  esse  additum,  quia  minus  late  dominati  fuerunt  Persae  et  Medi.  Sed  hoc  minime  convenit.  Scimus  enim  quam  ampla  fuerit  Medorum  dominatio  antequam  venirent  sub  potestatem  Cyri  et  Persarum.  Per  se  igitur  erant  potentissimi  Medi:  iam  accedunt  illis  Persae:  postea  occupat  Cyrus  quidquid  ante  fuerat  sub  monarchia  chaldaica.  Potitus  enim  est  etiam  claustris  Aegypti:  deinde  regnavit  in  Syria:  tenuit  Iudaeam,  et  perrexit  ultra  mare,  donec  tandem  devictus  fuit  apud  Scythas.  Cur  ergo  dicit  stetisse  ad  latus  unum?  Respicit  obscura  initia  regni  illius.  Nam  fama  Persarum  inclusa  fuerat  inter  montes,  donec  Cyrus  nomen  sibi  quaesivit  ex  rebus  gestis.  Fuit  enim  tam  strenuus  bellator,  ut  merito  obscuraverit  aliorum  omnium  gloriam.  Stabat  igitur  principio  bestia  illa  ad  unum  latus:  hoc  est,  Persae  nullius  erant  famae  aut  nominis,  nulla  erat  ipsorum  opulentia,  non  egressi  fuerant  ex  suis  latebris.  Videmus  ergo  restringi  hanc  particulam  ad  initia,  quae  obscura  fuerunt.  Tamen  addit  propheta  tres  costas  fuisse  in  ore  illius  bestiae  inter  dentes  eius,  ac  fuisse^  proclamatum,  Surge,  comede  carnem  multam.  Qui  per