40:42  propheta,  nempe  quod  carbones  illi  fuerint  tanquam  lampades.  Lampades  autem  splendorem  suum  longius  emittunt,  et  videntur  radios  suos  in  omnes  partes  diffundere,  quemadmodum  sol  ubi  sereno  aere  lucet.  In  summa,  intelligit  propheta  ignem  illum  non  fuisse  obscurum,  sed  plenum  scintillis,  et  inde  radios  fuisse  diffusos,  quemadmodum  si  lampades  essent  accensae.  Postea  dicit  ambulasse  inter  animalia.  Non  dubium  est  quin  ignis  sic  apparuerit  in  corporibus  animalium,  ut  quasi  lampades  discurrerent  huc  et  illuc.  Neque  enim  frustra  dicit  ambulasse  ignem  inter  animalia.  Vidit  igitur  propheta  formam  quasi  ignitam  in  animalibus:  sed  vidit  etiam  undique  ignem  micantem,  et  quasi  lampades  accensas,  quae  agitabantur  inter  ipsa  animalia.  Ita  voluit  Deus  ostendere  vigorem  spiritus  sui  in  omnibus  actionibus,  ne  scilicet  illum  metiamur  nostro  modo,  quemadmodum  haec  pravitas  est  nobis  ingenita.  Ubi  enim  sermo  fit  de  operibus  Dei,  concipimus  quod  capit  nostra  ratio,  et  volumus  Deum  quodammodo  affigere  nostris  imaginationibus.  Deus  autem  ostendit  ubi  operatur  illic  esse  vigorem  admirabilem,  quemadmodum  si  ignis  discurreret.  Hinc  ergo  vigor  ille  nobis  incomprehensibilis.  Postea  dicit  fuisse  splendorem  igni,  et  ab  igne  egressum  fuisse  fulgur.  Hoc  potuit  magis  afficere  prophetae  animum,  quum  videret  ignem  splendere  insolito  modo.  Scimus  saepe  ignem  esse  lucidum,  praesertim  ubi  flamma  accedit.  Sed  propheta  hic  aliquid  designat  minime  usitatum  :  quasi  diceret  non  fuisse  ignem  qualis  conspicitur  ubi  ligna  sunt  accensa,  sed  fuisse  ignem  splendidum:  unde  colligere  promptum  esset,  Deum  illic  proponere  visibilem  suam  gloriam.  Et  eadem  ratione  dicit  ab  igne  egressum  fuisse  fulgur.  Huc  ergo  pertinet  splendor  cuius  meminit,  quod  scilicet  mixtus  fuerit  ignis  fulgure.  Scimus  autem  non  posse  fulgur  conspici  quin  trepidemus.  Nam  videtur  uno  momento  aer  inflammari,  perinde  ac  si  Deus  vellet  mundum  quodammodo  absorbere.  Adspectus  ergo  fulguris  semper  nobis  terribilis  est.  Ideo  quo  magis  expavesceret  propheta  ad  visionem,  voluit  Deus  ostendere  formam  fulguris.  Noluit  quidem  prophetam  suum  expavefacere,  nisi  quatenus  humiliandus  erat.  Sed  quemadmodum  initio  admonui,  visio  haec  non  fuit  oblata  prophetae  in  privatum  suum  usum,  sed  ut  esset  utilis  toti  populo.  Interea  propheta  ipse,  ut  homo  erat,  opus  habuit  hac  praeparatione,  nempe  ut  humiliaretur.  Nam  semper  afferimus  nescio  quid  superbiae,  quod  reddit  sensus  nostros  obtusos,  ut  non  sint  capaces  gloriae  Dei.  Ergo  ubi  Deus  vult  nobis  familiariter  innotescere,  exuit  nos  omni  superbia,  omni  securitate.  Denique  humiliatio  principium  est  verae  intelligentiae.  Nunc  ergo  tenemus  cur  egressum  fuerit  fulgur  ab  igne:  hoc  idem  postea  confirmat.