39:42  nempe  quia  doctrina  erat  tantum  literalis  et  mortua,  ideoque  mortifera.  Nunc  autem  vocat  foedus  perpetuum  eodem  sensu.  Quod  foedus  legis  non  fuit  stabile,  vitium  illud  accidentale  fuit.  Nam  lex  permanet,  si  eam  duntaxat  respicimus,  sed  hominum  culpa  accidit,  ut  foedus  legale  fuerit  irritum,  et  statim  evanuerit.  Quum  ergo  Deus  aliquid  promittit,  notatur  manifestum  discrimen.  Quale  autem  est?  significat  Deus,  nullo  profectu  doctrinam  suam  hominibus  proponi,  quia  in  auribus  tantum  personet,  non  penetret  usque  in  corda  ipsorum.  Opus  est  igitur  gratia  spiritus  sancti  :  nisi  quia  Deus  intus  loquatur,  et  corda  nostra  tangat,  erit  inanis  sonitus,  qui  tantum  verberabit  aerem.  Nunc  ergo  videmus  cur  vocetur  foedus  perpetuum,  quod  Deus  nunc  promittit.  Iam  tenendum  est,  hoc  spectare  peculiariter  ad  regnum  Christi.  Tametsi  enim  fuit  haec  pars  gratiae  Dei  in  liberando  populo,  tamen  debuit  extendi  continua  series  gratiae  usque  ad  Christi  adventum.  Dubium  igitur  non  est,  quin  propheta  simul  cum  novo  foedere  Christum  producat  coram  oculis,  quia  sine  ipso  minime  sperandum  fuit,  ut  Deus  aliud  foedus  percuteret,  quemadmodum  constat  ex  tota  lege  et  prophetica  doctrina.  Ergo  hic  opponitur  Christus  Mosi,  et  evangelium  legi:  unde  sequitur,  legem  fuisse  temporale  foedus,  quia  nulla  fuit  eius  stabilitas,  quum  tantum  esset  literalis:  evangelium  vero  esse  foedus  perpetuum,  quia  inscribitur  cordibus.  Et  eadem  ratione  etiam  vocatur  foedus  novum,  quia  oportuit  legem  obsolescere,  quum  scilicet  succederet  haec  perpetuitas,  de  qua  nunc  propheta  loquitur.  Iam  sequitur  explicatio,  quod  non  recedam,  "Wtf  non  est  hic  relativum,  sed  potius  expletiva  est  vel  exegetica  particula.  Formam  ergo,  vel  naturam  foederis  breviter  designat,  quod  scilicet  Deus  nunquam  discedat  ab  ipsorum  tergo.  Dicitur  aliquando  Deus  praecedere  fideles  suos,  ubi  viam  demonstrat:  dicitur  etiam  eos  regere  a  tergo:  sicuti  trigesimo  capite  Isaiae  (V.  21)  quum  dicitur,  Audient  vocem  a  tergo  loquentis,  Haec  via  est,  incedite  in  ea.  Non  dubium  est,  quin  Deus  illic  testetur  se  fore  semper  magistrum  populo  et  doctorem.  Dicit  autem  se  a  tergo  loqui,  quemadmodum  paedagogi  sequuntur  pueros  sibi  commissos,  nempe  ut  observent,  ac  custodiant  omnes  eorum  gestus,  incessus,  et  verba,  et  quidquid  est:  ita  Deus  se  comparat  magistris,  quibus  traduntur  pueri  in  disciplinam:  et  dicit  se  loqui  a  tergo.  Posset  hoc  sensu  exponi  quod  hic  dicitur,  Non  discedam  de  post  ipsos,  sed  possumus  etiam  simplicius  accipere,  quod  Deus  non  discedet  ab  ipsis,  quia  scilicet  prosequetur  perpetuo  favore  et  gratia  ipsos,  quemadmodum  etiam  continuo  post  subiicitur,  ut  benefaciam  ipsis.  Denique  ostendit  Deus  se  fore  populo  aeternum  patrem,  qui  nunquam  ipsos  deseret,  vel  abiiciet.  Sed  modus  etiam  exprimitur,