35:42  pour  estre  faschez  quand  on  grattera  nos  rongnes:  et  ne  soyons  pas  si  fols  et  outrecuidez  de  penser  que  Dieu  se  doive  taire  pour  nous:  et  ne  demandons  point  d'estre  espargnez  sous  ombre  qu'il  y  a  quelque  qualite  en  nous.  Quand  nous  serions  et  Rois  et  Princes,  si  faut-il  baisser  le  col  pour  recevoir  le  ioug  de  Dieu:  car  il  faut  que  toute  hautesse  soit  abbatue,  comme  dit  sainct  Paul  en  la  seconde  des  Corinthiens  (10,  5).  Car  voila  pourquoy  l'Evangile  est  presche:  c'est  afin  que  grans  et  petis  se  rengent  a  Dieu,  et  se  laissent  gouverner  par  luy.  Ce  qui  ne  se  peut  faire,  que  nous  n'abaissions  (comme  sainct  Paul  traitte  en  ce  lieu-la)  toute  hautesse  qui  s'esleve  contre  la  maieste  de  nostre  Seigneur  Iesus  Christ.  Or  il  ne  faut  point  que  nous  attendions  qu'on  nous  force,  et  eontraigne  d'obeir  a  Dieu:  mais  qu'un  chacun  le  face  de  son  bon  gre.  Ceux  donc  qui  sont  en  quelque  estat  cognoissent,  que  s'ils  estoyent  plus  que  Rois,  encores  faut-il  que  leurs  personnes  s'humilient  quand  on  presche  la  verite  de  Dieu.  Et  pourquoy?  Car  il  faut  qu'ils  sachent,  Celuy  qui  parle,  de  quel  maistre  est-il  envoye?  de  celuy  qui  a  l'empire  souverain  sur  tout  le  genre  humain,  et  auquel  chacun  doit  suiettion.  Quand  donc  nous  serons  d'estat  moyen  (ie  vous  prie)  n'est-ce  pas  une  folie  par  trop  enragee  de  vouloir  qu'on  nous  supporte,  et  qu'on  dissimule,  et  que  nos  vices  soyent  convertis,  et  mesmes  que  la  verite  de  Dieu  soit  falsifiee  en  faveur  de  nous?  Dieu  se  peut-il  transfigurer?  Or  est-il  ainsi,  qu'il  veut  que  sa  parole  soit  son  image  vive.  Quand  donc  nous  demandons  qu'on  nous  flatte,  c'est  autant  comme  si  nous  requerions  que  Dieu  changeast  de  nature,  et  qu'il  se  renoncast,  a  fin  de  nous  complaire.  Ne  voila  point  une  temerite  par  trop  diabolique?  Apprenons  donc  de  venir  avec  toute  humilite  et  modestie  pour  ouir  la  parole  de  Dieu,  sachans  qu'il  faut  que  nostre  obeissance  soit  esprouvee  en  cest  endroit,  que  nul  ne  soit  espargne,  mais  que  les  fautes  soyent  remonstrees  en  droite  liberte  comme  il  appartient  Venons  maintenant  a  ce  qu'Eliu  adiouste.  Iob,  dit-il,  escoute  moy.  Or  il  est  vray  que  ie  parle  de  la  langue,  et  que  ie  prononce  mes  paroles  de  mon  palais:  mais  cependant  mes  propos  sont  la  droiture  de  mon  coeur,  et  tu  n'orras  de  ma  bouche  que  chose  veritable  et  droite.  Voicy  une  protestation  que  fait  Eliu  pour  estre  escoute,  c'est  assavoir  qu'il  parlera  non  point  en  feintise  et  comme  un  homme  double,  mais  selon  qu'il  a  cognu  les  choses,  et  qu'elles  luy  ont  este  revelees,  qu'il  les  mettra  purement  en  avant.  Voila  pour  le  premier.  Pour  le  second  il  adiouste,  Me  voici  quant  a  Dieu  comme  toi:  ou  bien  selon  ta  bouche.  Le  mot  dont  il  use  signifie  proprement  Bouche,  mais  aucunesfois  il  se  prend  pour  Mesure.  Or  nous  avons  veu  par  cy  devant,  que