31:42  quin  anxie  cum  gravissimis  tentationibus  ei  luctandum  fuerit.  Sed  quia  sibi  probe  conscius  erat,  se  nihil  temere  tentasse,  ut  ambitio  pravaque  cupiditas  plerosque  ad  res  novas  impellit  :  quin  potius  certo  persuasus  esset,  se,  quum  nihil  tale  appeteret,  divinitus  creatum  esse  regem  :  alta  fiducia  contra  totum  mundum  sese  erexit,  quemadmodum  his  verbis  magnifice  tam  regibus,  quam  eorum  copiis  insultat.  Fatetur  quidem  sibi  arduum  esse  certamen,  quia  non  exigua  tantum  manus,  sed  integri  populi  cum  regibus  in  eum  conspirent:  sed  deinde  animose  iactat,  frustra  id  fieri  :  quia  bellum  non  cum  homine  mortali,  sed  cum  Deo  ipso  suscipiunt.  Porro  incertum  est,  loquaturne  tantum  de  hostibus  intestinis,  an  vero  querimoniam  suam  ad  exteros  quoque  extendat.  Et  certe  quum  in  eum  hostes  undique  insurrexerint,  et  postquam  turbas  in  populo  composuit,  suo  etiam  ordine  infesti  fuerint  vicini:  ego  utrosque  libenter  complector,  tam  Iudaeos  quam  Gentes.  Durum  enim  esset  sub  pluribus  gentibus  ac  populis  notari  unam  gentem  :  item  de  multis  regibus  fieri  sermonem,  si  in  unum  Saulem  respiceret.  Adde,  quod  figurae  complemento  melius  quadrat,  diversas  hostium  species  coniungi;  quia  scimus  Christo  non  modo  cum  domesticis  hostibus,  sed  etiam  cum  extraneis  fuisse  negotium  :  quia  communis  fuit  ad  machinandam  eius  ruinam  totius  mundi  conspiratio.  Et  Iudaei  quidem  in  Christum,  sicut  in  Davidem,  priores  furere  coeperunt:  deinde  alias  gentes  eadem  insania  corripuit.  Haec  summa  est,  quamlibet  robustis  praesidiis  valeant  qui  conantur  eum  evertere,  irritos  tamen  esse  eorum  tumultus,  et  vana  consilia.  Populis  motum  et  fremitum  assignans,  regibus  et  proceribus  conventum  ad  ineunda  consilia,  aptissime  loquutus  est.  Interim  significat,  ubi  diu  multumque  consultaverint  reges,  ubi  populi  effuderint  suos  impetus,  omnes  nihil  profecturos.  Sed  notanda  est  fiduciae  ratio  quod  scilicet  non  temere  vel  privato  motu  se  ingesserit  ad  regnandum,  sed  tantum  Dei  vocationem  sequutus  sit.  Unde  colligit  in  sua  persona  Deum  impeti:  quia  fieri  non  potest  quin  regni,  cuius  est  auctor,  se  vindicem  ostendat.  Nam  se  titulo  Messiae  vel  Christi  insigniens  nonnisi  Dei  auspiciis  ac  mandato  se  regnare  praedicat:  quia  allata  per  manum  Samuelis  unctio  eum  regem  ex  privato  homine  creaverit.  Non  putabant  quidem  hostes  Davidis  se  contra  Deum  ruere,  imo  hunc  sibi  esse  animum  fortiter  negassent:  non  tamen  abs  re  David  illis  Deum  opponit,  quasi  recta  contra  eum  suos  impetus  dirigant:  quia  regnum  ab  ipso  erectum  habefactare  volentes,  caeca  ferocia  in  ipsum  incurrunt.  Nam  si  Deo  sunt  rebelles  quicunque  potestati  ab  eo  ordinatae  resistunt,  id  longe  verius  competere  debuit  in  sacrum  illud  regnum  quod  singulari  privilegio  sancitum  fuit.  Sed  iam  ad  figurae  substantiam  venire  operae  pretium  est.  Quod  42