3:42  qui  avoit  belle  monstre  de  vertu,  se  descouvrira  n'estre  que  debilité.  Voila  comme  ce  qui  semble  en  nous  parfait  iusques  au  bout,  ne  peut  nullement  satisfaire  à  la  pureté  de  Dieu.  3.  Voila  dont  est  procedé  l'horreur  et  estonnement  duquel  l'Escriture  recite  que  les  Saincts  ont  esté  affligez  et  abatus  toutes  fois  et  quantes  qu'ils  ont  senti  la  presence  de  Dieu.  Car  quand  nous  voyons  ceux  qui  estans  comme  eslongnez  de  Dieu  se  trouvoyent  asseurez  et  alloyent  la  teste  levée,  si  tost  qu'il  leur  manifeste  sa  gloire,  estre  esbranlez  et  effarouchez,  en  sorte  qu'ils  sont  opprimez,  voire  engloutis  en  l'horreur  de  mort,  et  quasi  s'esvanouissent:  de  là  on  peut  bien  conclurre  que  les  hommes  ne  sont  iamais  assez  bien  touchez  et  esmeus  du  sentiment  de  leur  povreté,  iusques  à  ce  qu'ils  se  soyent  comparez  à  la  maiesté  de  Dieu.  Or  de  tel  estonnement  nous  avons  assez  d'exemples  tant  aux  Iuges  que  Dieu  a  gouvernez  en  Iudée,  qu'aux  Prophetes:  tellement  que  ce  propos  estoit  coustumier  entre  le  peuple  ancien,  Nous  mourrons:  car  nous  avons  veu  le  Seigneur  (Iug.  13,  22;  Es.  6,  5;  Ezech.  1,  28;  3,  14,  et  ailleurs).  Parquoy  l'histoire  de  Iob,  pour  abatre  les  hommes  d'une  droite  apprehension  de  leur  bestise,  debilité  et  souilleure,  tire  tousiours  son  principal  argument  de  ceste  source:  c'est  de  monstrer  quelle  est  la  sagesse,  vertu  et  pureté  de  Dieu;  et  non  sans  cause.  Nous  voyons  comme  Abraham,  d'autant  plus  qu'il  est  approché  pour  contem-