28:42  hommes.  Malheur  donc  sur  nous  si  nous  y  procedons  ainsi.  Mais  nous  devons  (comme  dit  sainct  Paul)  procurer  le  bien,  non  pas  seulement  devant  Dieu  en  nostre  conscience:  mais  aussi  devant  les  hommes:  afin  que  nous  ne  soyons  point  en  scandale,  et  qu'on  ne  face  point  bouclier  de  nous,  quand  on  voudra  commettre  quelque  faute,  qu'on  n'allegue  point:  Et  un  tel  ne  l'a-il  point  fait?  Car  si  on  prend  occasion  d'offenser  Dieu  sur  nous,  et  que  sera-ce?  Voila  donc  a  quelle  fin  il  nous  faut  conserver  nostre  honneur  entant  qu'en  nous  sera.  Et  pour  ceste  cause  il  est  ici  dit.  Que  si  quelcun  ayant  prins  femme,  l'aceuse  qu'elle  se  fust  mal  portee  auparavant,  que  le  pere  et  la  mere  seront  pour  maintenir  l'honnestete  de  leur  fille  :  et  l'homme  qui  aura  este  trouve  avoir  charge  a  tort  celle  qu'il  avoit  promise  pour  sa  femme,  sera  chastie  tant  en  son  corps  qu'en  argent:  et  la  fille  luy  demeurera,  en  sorte  qu'il  ne  la  pourra  iamais  repudier.  Nous  voyons  maintenant  comme  Dieu  n'a  point  voulu  permettre  a  un  mari,  qu'il  blasmast  sa  femme  a  tort:  par  plus  forte  raison  donc  il  ne  sera  point  licite  a  un  estranger  de  mettre  quelque  diffame  sur  la  chastete  d'une  qui  se  trouvera  innocente.  Car  le  mari  pourroit  alleguer  qu'il  a  plus  grande  liberte,  d'autant  qu'il  est  superieur  et  chef.  Mais  quoy  qu'il  en  soit,  si  est-ce  que  Dieu  veut  qu'une  femme  ne  soit  point  faussement  blasmee,  et  que  le  mari  soit  chastie,  voire  en  sa  personne.  Car  outre  l'argent  qui  est  ici  exprime,  il  y  avoit  aussi  la  correction  des  Iuges.  Or  notons  que  ceci  n'estoit  pas  seulement  pour  conserver  l'honneur  d'une  femme:  mais  c'estoit  aussi  pour  inciter  les  femmes  a  estre  chastes,  quand  Dieu  se  declaroit  estre  protecteur  de  leur  honnestete.  Quand  nous  voyons  que  Dieu  a  le  soin,  que  celles  qui  auront  vescu  honnestement  et  sans  reproche,  soyent  maintenues  ainsi  en  leur  honneur,  et  que  le  mari  soit  chastie  quand  il  imposera  blasme:  quand  nous  voyons  que  Dieu  descend  iusques  la,  pour  faire  un  tel  office,  les  femmes  seront-elles  bien  si  villaines,  et  si  brutalles,  qu'elles  s'abandonnent  a  mal?  Car  voila  un  privilege  qui  ne  peut  estre  trop  prise:  et  elles  s'en  mocqueront.  Voila  donc  a  quelle  fin  Dieu  a  pretendu,  et  ce  que  nous  avons  a  retenir  en  ceste  loy.  Or  cependant  notons,  que  quand  les  Iuges  et  magistrats  sont  admonnestez  de  leur  office,  chacun  aussi  en  son  particulier  doit  recueillir  doctrine  de  cela.  Comme  quoy?  Si  un  blasme  est  mis  sur  quelque  personne  innocente,  l'office  de  ceux  qui  ont  le  glaive,  est  de  conserver  l'honneur  a  chacun.  Voila  ce  que  Dieu  leur  commande.  Mais  de  nostre  coste  n'attendons  point  que  les  jnagistrats  et  iuges  nous  punissent,  pour  avoir  faussement  blasme  quelcun:  mais  gardons-  nous  de  toute  calomnie,  veu  que  c'est  une  chose  desplaisante  a  Dieu.  Advisons  donc  de