2:42  [CO  2.42]  dicit  contignasse  in  aquis,  nubes  eius  esse  vehicula,  equitare  super  alas  ventorum,  ventos  et  fulgetra  celeres  esse  eius  nuntios.  Et  quoniam  plenius  sursum  refulget  potentiae  eius  et  sapientiae  gloria,  passim  vocatur  coelum  eius  palatium.  Ac  primum,  quaquaversum  oculos  coniicias,  nulla  est  mundi  particula  in  qua  non  scintillae  saltem  aliquae  gloriae  ipsius  emicare  cernantur.  Amplissimam  vero  hanc  et  pulcherrimam  machinam,  quam  late  patet,  uno  intuitu  lustrare  nequeas  quin  vi  immensa  fulgoris  totus  undique  obruaris.  Quare  eleganter  autor  epistolae  ad  Hebraeos  (  l  l  ,  3)  saecula  nuncupat  invisibilium  rerum  spectacula;  quod  nobis  vice  speculi  sit  tam  concinna  mundi  positio,  in  quo  invisibilem  alioqui  Deum  contemplari  liceat.  Qua  ratione  propheta  (Psal.  19,  1)  coelestibus  creaturis  idioma  attribuit,  nullis  nationibus  incognitum;  quod  evidentior  illic  exstat  divinitatis  testificatio  quam  ut  praeterire  gentis  ullius  vel  obtusissimae  considerationem  debeat.  Quod  clarius  enarrans  apostolus  (Rom.  1,  19),  patefactum  esse  hominibus  dicit  quod  de  Deo  cognosci  operae  pretium  erat;  quia  invisibilia  eius,  ad  aeternam  usque  eius  virtutem  et  divinitatem,  a  creatione  mundi  intellecta,  omnes  ad  unum  conspiciunt.  [Inst  1.5.2.]  Mirificam  eius  sapientiam  quae  testentur,  innumera  sunt  tum  in  coelo,  tum  in  terris  documenta:  non  illa  modo  reconditiora,  quibus  propius  observandis  astrologia,  medicina,  et  tota  physica  scientia  destinata  est;  sed  quae  rudissimi  cuiusque  idiotae  aspectui  se  ingerunt,  ut  aperiri  oculi  nequeant  quin  eorum  cogantur  esse  testes.  Equidem  qui  liberales  illas  artes  vel  imbiberunt,  vel  etiam  degustarunt,  earum  subsidio  adiuti  longe  altius  provehuntur  ad  introspicienda  divinae  sapientiae  arcana;  nemo  tamen  earum  inscitia  impeditur  quominus  artificii  satis  superque  pervideat  in  Dei  operibus,  unde  in  opificis  admirationem  prorumpat.  Nempe  ad  disquirendos  astrorum  motus,  distribuendas  sedes,  metienda  intervalla,  proprietates  notandas,  arte  ac  exactiore  industria  opus  est;  quibus  perspectis,  ut  Dei  providentia  explicatius  se  profert,  ita  in  eius  gloriam  conspiciendam,  animum  par  est  aliquanto  sublimius  assurgere.  Sed  quum  ne  plebeii  quidem  et  rudissimi,  qui  solo  oculorum  adminiculo  instructi  sunt,  ignorare  queant  divinae  artis  excellentiam,  ultro  se  in  ista  innumerabili,  et  tamen  adeo  distincta  et  disposita  coelestis  militiae  varietate  exserentem,  constat  neminem  esse  cui  non  abunde  sapientiam  suam  Dominus  patefaciat.  Similiter  in  humani  corporis  structura  connexionem,  symmetriam,  pulchritudinem,  usum,  ea  quam  Galenus  adhibet  solertia  pensiculare,  eximii  est  acuminis.