47:419  419  IN  EVANGELIUM  IOANNIS  420  sit  nobis  suo  arbitrio  vivere,  etiamsi  inter  maximos  dolores  languendum  sit.  Ut  impleretur  scriptura.  Ex  aliis  evangelistis  colligere  promptum  est,  notari  locum  ex  Psalmo  69,  22:  Dederunt  in  escam  meam  fel,  et  in  siti  mea  potarunt  me  aceto.  Haec  quidem  loquutio  metaphorica  est,  qua  significat  David,  non  modo  sibi  negatam  fuisse  opem  qua  egebat,  sed  mala  crudeliter  fuisse  duplicata,  Sed  nihil  absurdi  est,  si  in  Christo  clarius  exhibitum  fuerit,  quod  tenuiter  adumbratum  fuerat  in  Davide.  Nam  hinc  melius  perspicimus,  quantum  differat  a  figuris  veritas,  quum  palam  et  quasi  in  solidum  apparent  in  Christo,  quae  tantum  figurate  passus  est  David.  Ergo  ut  ostenderet  Christus,  se  eum  esse  cuius  David  sustinuerat  personam,  voluit  aceto  potari:  idque  in  fidei  nostrae  confirmationem.  Qui  sensum  allegoricum  fabricant  in  verbo  sitiendi,  argutiae  magis  quam  verae  aedificationi  student,  et  palam  refellit  eos  evangelista,  qui  petitum  a  Christo  acetum  fuisse  dicit,  quum  ad  mortem  properaret.  Quum  dicit  spongiam  hyssopo  fuisse  circumdatam,  intellige  in  arbusti  baculo  fuisse  defixam,  ut  posset  ad  os  Christi  admoveri.  30.  Consummatum  est  Idem  verbum  repetit  quo  nuper  usus  fuerat.  Caeterum  haec  Christi  vox  memoratu  imprimis  digna  est,  quia  docet  in  eius  morte  totum  salutis  nostrae  complementum  et  singulas  partes  contineri.  Iam  ante  monuimus,  non  disiungi  a  morte  resurrectionem:  tantum  Christi  consilium  est,  fidem  nostram  retinere  in  se  uno,  ne  huc  vel  illuc  deflectat.  Sensus  ergo  est:  Quidquid  ad  salutem  hominum  facit,  in  Christo  constare,  nec  alibi  quaerendum:  vel,  quod  idem  est:  Salutis  perfectionem  in  eo  esse  inclusam.  Subest  autem  tacita  antithesis,  quia  mortem  suam  veteribus  sacrificiis  et  figuris  omnibus  opponit  Christus,  ac  si  diceret,  Quidquid  sub  lege  in  usu  fuit  nihil  ad  expianda  peccata,  ad  iram  Dei  placandam,  ad  comparandam  iustitiam  per  se  valebat:  nunc  demum  vera  mundo  ostensa  et  exhibita  est  salus.  Huic  doctrinae  annexa  est  omnium  legis  rituum  abrogatio.  Umbras  enim  iam  sectari,  ex  quo  habemus  in  Christo  corpus,  praeposterum  esset.  Quod  si  in  hac  Christi  voce  acquiescimus,  una  eius  morte  ad  salutem  contentos  esse  nos  decet,  nec  ulla  aliunde  subsidia  accersere  fas  est.  Atqui  huc  spectat  tota  papatus  religio,  ut  homines  sibi  innumeros  quaerendae  salutis  modos  excogitent:  unde  colligimus  abominandis  sacrilegiis  scatere.  Praecipue  hac  Christi  voce  damnatur  missae  abominatio:  cessare  omnia  legis  sacrificia  oportuit,  quia  unico  mortis  Christi  sacrificio  perfecta  fuit  hominum  salus.  Quo  igitur  iure  vel  praetextu  sibi  licuisse  papistae  dicent,  sacrificium  novum  erigere,  quod  Deum  hominibus  reconciliet?  Excipiunt  non  esse  novum,  sed  illud  idem  quod