55:418  priores  in  nobis  partes  sitas  esse,  Dei  gratiam  postea  subsequi:  nihil  tale  voluit  apostolus.  Neque  enim  si  hoc  facere  debemus,  protinus  sequitur  etiam  nos  posse.  Et  spiritus  Dei  quum  nos  ad  officium  hortatur,  sibi  aut  suae  virtuti  nihil  derogat  quin  hoc  ipsum  quod  iubet,  impleat  idem  quoque  in  nobis.  In  summa,  nihil  aliud  voluit  Iacobus  hoc  loco,  quam  nobis  Deum  nunquam  deesse,  nisi  quia  nos  ab  ipso  alienamus:  quemadmodum  si  quis  famelicos  ad  mensam,  et  ad  fontem  sitientes  abduceret,  Hoc  interest  quod  gressus  nostros  a  Domino  et  regi  et  sustineri  oportet:  quia  nos  pedes  deficiunt.  Porro  quod  cavillantur,  secundariam  et  quasi  pedisequam  esse  Dei  gratiam  nostrae  praeparationi,  quia  Deum  appropinquare  posteriore  loco  Iacobus  dicat:  frivolum  est.  Scimus  enim  non  esse  novum  ut  priores  suas  gratias  novis  augeat:  hocque  modo  locupletet  magis  ac  magis,  quibus  iam  multum  dederat.  Mundate  manus.  Compellat  hic  omnes  a  Deo  alienatos.  Neque  vero  duo  hominum  genera  designat:  sed  eosdem  vocat  peccatores,  et  duplices  animo.  Neque  quosvis  peccatores  intelligit:  sed  sceleratos  et  vitae  corruptioris.  Quemadmodum  Iohan.  cap.  9,  3,  Deus  peccatores  non  exaudit.  Quo  sensu  mulier  peccatrix  a  Luca  dicitur  (7,  37):  ab  eodem  et  reliquis  evangelistis:  Hic  cum  peccatoribus  edit  ac  bibit.  Quare  non  omnes  promiscue  ad  poenitentiae  speciem,  cuius  hic  fit  mentio,  invitat:  sed  qui  corde  sunt  pravo  et  corrupto,  vita  autem  turpi  et  flagitiosa,  vel  certe  scelerata,  ab  his  exigit  cordis  puritatem  et  munditiem  operum.  Unde  colligimus,  quae  vera  sit  poenitentiae  ratio  ac  natura:  ubi  scilicet  non  tantum  corrigitur  vita  exterior,  sed  initium  fit  ab  animi  repurgatione:  sicuti  econverso  necesse  est  ut  interioris  resipiscentiae  fructus  in  operum  integritate  appareant.  9.  Affligimini,  lugete.  Moerorem  Christus  denuntiat  iis  qui  rident,  pro  maledictione.  Et  Iacobus  paulo  post  in  eandem  sententiam  divitibus  luctum  minabitur.  Verum  hic  agit  de  salutari  tristitia  quae  nos  ad  poenitentiam  adducit.  Eos  alloquitur  qui  mente  inebriati  Dei  iudicium  non  sentiunt:  ita  fit  ut  sibi  in  vitiis  placeant.  Mortiferum  hunc  torporem  ut  illis  excutiat,  admonet  ut  lugere  discant,  conscientiae  scilicet  dolore  tacti:  ac  sibi  adulari  et  plaudere  in  propinquo  exitio  desinant.  Risus  ergo  pro  delitiis  capitur,  quas  sibi  faciunt  impii,  dum  infatuati  scelerum  dulcedine,  Dei  iudicium  obliviscuntur.  10.  Humiliamini.  Conclusio  est  superiorum:  tunc  expositam  nobis  fore  Dei  gratiam  ad  nos  erigendos,  ubi  altos  illos  spiritus  deposuisse  nos  viderit.  Ideo  aemulamur  et  invidemus,  quia  cupimus  eminere.  Haec  praepostera  est  ratio.  Dei  enim  pro-  27