54:416  volee,  et  de  nous  ingerer  la  comme  un  pourceau  viendra  ietter  le  groin  en  son  auge:  un  tel  sacrilege  ne  demeureroit  point  impuni.  Mais  toutesfois  et  quantes  que  la  saincte  Cene  nous  est  apprestee,  cognoissons  que  nous  sommes  admonestez  de  nos  foiblesses,  et  que  Dieu  veut  subvenir  a  nostre  infirmite.  Il  est  vray  que  cela  se  fait  quand  l'Evangile  nous  est  presche  tous  les  iours:  par  prieres  et  oraisons  nous  faisons  le  mesme:  quand  nous  lisons  en  nostre  maison,  ou  que  nous  oyons  quelque  propos  a  nostre  salut,  Dieu  tousiours  nous  monstre  en  cela  qu'il  nous  supporte:  mais  cependant  la  Cene  encores  nous  est  un  tesmoignage  special  que  nous  sommes  aidez  de  nostre  Dieu,  quand  nous  sommes  comme  au  milieu  du  chemin,  que  c'est  pour  nous  faire  passer  outre,  pour  tendre  tousiours  a  nostre  Dieu.  Notons  aussi  que  la  Cene  est  pour  corriger  et  pour  achever  les  choses  qui  defaillent  encores.  Car  ce  ne  seroit  rien  de  commencer  en  nous,  sinon  que  Dieu  continuast  a  nous  faire  sentir  sa  grace:  et  nous  en  avons  une  bonne  certitude  en  la  Cene.  Malheur  donc  sur  nous  quand  nous  viendrons  polluer  ceste  saincte  table  qui  nous  est  donnee  pour  aide  de  nostre  salut.  Et  ainsi  advisons  d'estre  bien  fondez  en  foy,  et  en  repentance,  et  en  charite,  pour  y  communiquer.  Et  puis  que  nous  sommes  assez  convaincus  de  nostre  debilite  et  foiblesse,  et  que  nous  n'avons  point  tout  ce  qui  seroit  requis,  que  nous  demandions  a  Dieu  qu'il  nous  fortifie,  qu'il  nous  advance,  et  qu'il  nous  augmente  la  foy,  et  l'esperance  que  nous  avons  a  la  vie  celeste,  et  que  nous  y  tendions  de  tout  nostre  pouvoir,  qu'un  chacun  s'efforce  et  s'esvertue:  non  pas  que  nous  le  puissions  faire  de  nous-mesmes,  mais  demandons  a  Dieu  la  vertu,  et  il  ne  nous  defaudra  point.  Voila  donc  ce  que  nous  avons  a  retenir  en  ce  passage.  Et  que  nous  advisions  d'estre  tellement  edifiez,  qu'un  chacun  procure  l'advancement  de  ses  prochains,  et  que  sans  porter  envie  l'un  a  l'autre,  nous  taschions  tous  d'estre  advancez  selon  Dieu  et  nostre  Seigneur  Iesus  Christ,  estans  conioints  de  ce  lien  sacre  et  inseparable  qu'il  a  dedie  entre  nous,  quand  il  nous  a  appelez  pour  estre  membres  de  son  corps,  afin  qu'il  soit  servi  et  honore  de  nous,  et  qu'en  la  fin  nous  soyons  heritiers  de  sa  gloire  celeste  avec  luy.  Or  nous-nous  prosternerons  devant  la  face  de  nostre  bon  Dieu,  etc.