32:416  Dei  creaturas  trahere,  non  repugno.  Sed  distincta  ratio  docendi,  cuius  hic  meminit  David,  nonnisi  sanctis  convenit.  Ideoque  futurum  tempus  in  verbis  retineo,  quod  alii  resolvunt  in  modum  optandi.  Caeterum  sub  regni  voce  significat  David  huc  tendere  manifestationem  operum  Dei,  ut  totus  orbis  in  ordinem  coactus  eius  imperio  se  subiiciat.  Commendat  vero  regni  praestantiam,  ut  sciant  homines  omnia  esse  perversa  et  confusa,  nisi  emineat  solus  Deus.  Postea  exclamat  regnum  hoc  minime  caducum  esse,  ut  sunt  terrena  omnia,  sed  firmum  perpetuo  stare.  Atque  ut  haec  aeternitas  attentius  reputetur,  prae  admiratione  exclamans  sermonem  ad  Deum  ipsum  dirigit.  14.  Sustentans  Iehova  omnes  cadentes,  et  erigens  omnes  curvatos.  15.  Oculi  omnium  ad  te  sperant,  et  tu  das  illis  cibum  ipsorum  tempore  suo,  16.  Aperis  manum  tuam,  et  satias  omne  vivens  beneplacito.  14.  (Sustentans  Iehova  omnes.)  Exempla  quaedam  bonitatis  et  clementiae  Dei  recenset,  ex  quibus  apparet  Deum  non  dominari  nisi  in  publicam  salutem  humani  generis.  Per  cadentes  et  curvatos  metaphorice  intelligit  quicunque  rebus  adversis  oppressi  mox  succumberent  nisi  Deus  manum  ad  eos  fulciendos  porrigeret.  Summa  est,  Deum  respicere  hominum  aerumnas,  ut  laborantibus  succurrat.  Unde  sequitur,  dignum  esse  non  modo  quem  reverenter  suspiciant  cuncti  mortales  in  coelo  regnantem,  sed  cui  regendos  libenter  et  cupide  se  permittant.  Interea  admonet,  minime  frustratum  iri  quicunque  solatium  suis  miseriis  a  Deo  petent.  15.  (Oculi  omnium.)  Documentum  aliud  bonitatis  Dei  profert  David,  quod  cunctis  animantibus  victum  suppeditans  patremfamilias  se  illis  exhibeat.  Quidam  interpretes,  adducti  verbo  sperandi,  ad  solos  homines  hoc  restringunt  ratione  et  intelligentia  praeditos,  ut  alimenta  a  coelesti  patre  petant:  quia  bruta  animalia  visu  tantum  et  olfactu  cibum  quaerunt.  Verum  quamvis  ingenita  illis  non  sit  ratio  ut  pendeant  a  Dei  providentia,  quia  tamen  necessitas  ipsa  arcano  quodam  instinctu  ea  ad  cibum  quaerendum  compellit,  non  abs  re  dicuntur  in  Deo  sperare:  sicuti  alibi  dicuntur  eum  invocare  pulli  corvorum,  Psal.  147,  9.  Qui  vero  ad  homines  restringnnt,  ne  hoc  quidem  modo  effugiunt  absurditatem:  quia  impii  nihilo  magis  quam  boves  et  asini,  ad  paternam  Dei  curam  attenti  sunt.  Quando  igitur  ita  compositus  est  naturae  ordo,  ut  cuncta  animalia  ferantur  ad  suum  opificem,  non  male  conveniet  affectum  hic  pro  re  ipsa  esse  positum.  Et  proximo  versu  tollitur  omnis  ambiguitas,  ubi  dicitur  omne  animal  saturari.  Dicit  autem  illis  dari  cibum  suum  et  tempore  suo,  quia  varietas  ipsa  magis  illustrat  Dei  providentiam,  dum  singulis  diversa  est  pascendi