47:415  415  IN  EVANGELIUM  IOANNIS  416  tamen  hoc  evangelii  praeconium  nescienti  quid  scriberet  dictavit.  Eodem  arcano  spiritus  impulsu  factum  est,  ut  titulum  publicaret  triplici  lingua.  Neque  enim  credibile  est,  fuisse  hoc  ex  communi  usu,  sed  Dominus  hoc  praeludio  monstravit  iam  tempus  instare,  quo  filii  sui  nomen  ubique  innotesceret.  21.  Dixerunt  ergo  Pilato  sacerdotes.  Sentiunt  se  odiose  perstringi:  atque  ideo  cuperent  mutari  titulum,  qui  sine  gentis  infamia  Christum  solum  gravaret.  Caeterum  interea  non  dissimulant,  quanto  veritatis  odio  infecti  sint,  qui  ne  minimam  quidem  eius  scintillam  ferre  queunt.  Ita  semper  ministros  suos  instigat  Satan,  qui,  simul  ac  minimum  aliquid  emicat  divinae  lucis,  suis  tenebris  exstinguere  vel  saltem  suffocare  conentur.  Constantia  vero  Pilati  divinae  providentiae  tribuenda  est:  neque  enim  dubium,  quin  eius  animum  variis  modis  tentaverint.  Sciamus  ergo  divinitus  fuisse  retentum,  ut  inflexibilis  maneret.  Non  cessit  Pilatus  sacerdotum  precibus  ,  nec  se  ab  illis  corrumpi  sustinuit  :  at  Deus  per  os  eius  testatus  est,  quam  stabile  sit  filii  sui  regnum.  Quod  si  in  Pilati  scriptura  maior  ostensa  fuit  regni  Christi  firmitas,  quam  ut  hostium  machinis  concuti  posset:  quid  de  prophetarum  testimoniis  sentiendum,  quorum  ora  et  manus  sibi  Deus  sacravit?  Pilati  quoque  exemplum  officii  nostri  nos  admonet,  ut  constantes  simus  in  tuenda  veritate.  Non  retractat  homo  profanus  quod  vere,  licet  sine  mente  et  consilio  de  Christo  scripsit:  quantum  ergo  dedecus,  si  minis  vel  periculis  territi  discedimus  ab  eius  doctrinae  professione,  quam  Deus  cordibus  nostris  per  spiritum  suum  obsignavit?  Notandum  praeterea  est,  quam  exsecranda  sit  tyrannis  papistica,  quae  plebem  ab  evangelii  et  totius  scripturae  lectione  arcet.  Pilatus,  homo  reprobus  et  alioqui  Satanae  organum,  arcano  tamen  instinctu  destinatus  fuit  evangelii  praeco,  ut  brevem  eius  summam  tribus  linguis  vulgaret.  Qui  ergo  eius  notitiam  quantum  in  se  est  suppressam  curant,  quo  loco  nobis  habendi  sunt,  quum  se  prodant  Pilato  nequiores?  23.  Milites  ergo,  quum  crucifixissent  Iesum,  acceperunt  vestimenta  eius  et  fecerunt  quatuor  partes,  unicuique  militi  partem  et  tunicam.  Erat  autem  tunica  inconsutilis  a  summo  contexta  per  totum  24.  Dixerunt  ergo  inter  se:  Ne  scindamus  eam  :  sed  sortiamur  de  ea,  cuius  sit,  ut  scriptura  impleretur,  dicens:  Partiti  sunt  vestimenta  mea  sibi  et  super  vestitu  meo  miserunt  sortem.  Et  milites  quidem  haec  fecerunt.  23.  Milites  ergo.  De  vestibus  Christi  inter  milites  divisis  apud  alios  quoque  evangelistas  fit  mentio.  Quatuor  erant  milites,  qui  reliquum  vestitum  inter  se  partiti  sunt.  Restabat  tunica  inconsutilis,  quae  quum  dividi  non  posset,  super  eam  sors  iacta  est.  Ut  mentes  nostras  in  considerando