8:414  que  Dieu  commande  a  tous  les  siens.  Vray  est  que  la  grace  de  Dieu  n'est  point  attachee,  et  la  vertu  de  son  Esprit  n'est  point  enclose  ni  aux  Sacremens,  ni  a  toutes  choses  externes,  qu'il  ne  puisse  besongner,  quand  il  luy  plaira,  sans  nul  moyen:  mais  yci  nous  traictons  de  l'ordre  perpetuel  qu'il  a  mis  en  son  Eglise,  et  non  pas  de  ce  qu'il  faict  extraordinairement  comme  miracle.  Tant  y  a  que  ceulx  qui  sont  privez  de  l'usage  des  Sacremens  et  de  la  liberte  de  povoir  invoquer  son  nom,  et  ne  sentent  point  leur  mal  et  misere  pour  en  gemir,  sont  plus  stupides  que  les  bestes  brutes.  Ie  di  d'avantage,  que  si  David  en  son  temps  a  eu  iuste  occasion  de  dire:  Seigneur,  que  ton  Temple  est  desirable!  Bienheureux  sont  ceulx  qui  habitent  en  ta  maison:  [f.  44]  mon  ame  brusle  du  desir  qu'elle  ha  d'entrer  au  parvis  du  Seigneur:  qu'auiourd'huy  nous  debvons  estre  esmeus  et  enflambez  a  cela  plus  qu'au  double.  Car,  quels  estoyent  les  biens  du  Temple,  lesquels  David  regrettoit  tant,  iusqu'a  estre  ennuye  de  sa  vie  quand  il  s'en  voyoit  prive?  Vray  est  qu'en  substance  c'estoyent  ceulx  que  nous  avons  auiourd'huy:  mais  nous  scavons  que  c'estoyent  ombrages  obscurs,  la  ou  Dieu  ne  desployoit  pas,  a  beaucoup  pres,  sa  grace  telle  que  nous  l'avons  a  present.  Car  Dieu  se  declare  si  privement  a  nous  en  l'ordre  de  l'Eglise,  que  les  cieulx  nous  sont  (par  maniere  de  dire)  ouverts.  Les  Sacremens  ne  nous  monstrent  pas  Iesus  Christ  de  loing  comme  soubs  la  Loy,  mais  le  nous  mettent  devant  les  yeulx.  Parquoy  il  fault  bien  que  nous  soyons  par  trop  ingrats,  si  nous  ne  preferons  ces  biens  a  tout  ce  que  David  povoit  iadis  trouver  au  Temple  de  Sion.  Nous  ne  sommes  plus  aux  parvis,  comme  David  en  parle.  Il  n'y  a  plus  de  voile  tendu  qui  nous  eslongne  du  Sanctuaire.  En  somme,  c'est  bien  mal  honorer  la  grandeur  infinie  des  biens  que  Dieu  nous  fait,  quand  pour  le  moins  nostre  desir  n'est  point  egual  a  celuy  de  David.  Ie  di  ceci  par  simple  forme  de  doctrine:  car  l'exhortation  suyvra  apres  en  son  lieu.  Il  reste  de  veoir  de  plus  pres  quel  a  este  ce  desir,  a  fin  de  nous  y  conformer,  comme  a  nostre  reigle.  I'ay  demande,  dit-il,  une  chose  au  Seigneur.  Parlant  d'une  chose  seule,  il  signifie  qu'il  y  a  este  si  fort  addonne,  qu'il  a  laisse  les  autres  derriere,  comme  s'il  les  eust  mises  en  oubli.  Estoit-ce  qu'il  iouist  de  tous  ses  souhais,  tellement  qu'il  n'y  eust  que  ce  poinct  qui  luy  desfaillist?  Au  contraire,  il  estoit  fugitif  de  la  terre  de  sa  naissance,  banni  mesme  de  la  maison  de  son  pere  et  de  la  compaignie  dc  ses  parens  et  amis.  Il  estoit  despouille  de  tous  ses  biens,  prive  de  ses  estas  et  honneurs,  qui  avoyent  este  grans.  On  luy  avoit  ravi  sa  femme.  Brief,  voyla  un  homme  desole  en  tout  et  par  tout:  neantmoins,  il  ne  regrette  qu'une  chose,  c'est  d'avoir  acces  au  Temple: