47:414  fuisse  exsecrationi  subiectum,  ut  nos  a  maledictione  legis  redimeret,  Galat.  3,  13  :  factum  esse  peccatum,  ut  in  eo  simus  iustitia  Dei,  2.  Cor.  5,  21  :  eductum  esse  extra  urbem,  ut  sordes  nostras  quae  illi  impositae  erant  secum  e  medio  tolleret,  Hebr.  13,  12.  Eodem  pertinet  quod  postea  de  latronibus  sequitur.  Quasi  enim  per  se  non  sufficeret  supplicii  atrocitas,  medius  suspenditur  inter  duos  latrones,  quasi  non  unus  quilibet  esset  ex  aliorum  numero,  sed  omnium  sceleratissimus  et  maxime  detestabilis.  Semper  enim  memoria  repetendum  est  illud,  nihil  fecisse  impios  Christi  carnifices  nisi  quod  Dei  manu  et  consilio  decretum  esset.  Neque  enim  filium  suum  exposuit  Deus  illorum  libidini,  sed  ex  suo  arbitrio  et  animi  sententia  sibi  tanquam  victimam  immolari  voluit.  Quod  si  optima  ratione  non  caruit  Dei  consilium  in  omnibus  his,  quae  pati  filium  suum  voluit,  tum  horribilis  irae  illius  gravitas  adversus  peccatum,  tum  immensa  erga  nos  bonitatis  eius  magnitudo  nobis  reputanda  est.  Non  aliter  aboleri  potuit  noster  omnium  reatus,  nisi  filius  Dei  catharma  pro  nobis  fieret.  Videmus  eum  quasi  omni  scelerum  congerie  pollutum  in  locum  exsecrabilem  cogi,  ut  illic  coram  Deo  et  hominibus  maledictus  appareat.  Nimis  certe  stupidi  sumus,  nisi  in  hoc  speculo  clare  cernimus,  quantopere  abominetur  Deus  peccata.  Plus  quam  vero  saxei,  nisi  expavescimus  ad  tale  eius  iudicium.  Dum  autem  altera  ex  parte  testatur  Deus  sibi  tam  caram  fuisse  nostram  salutem,  ut  filio  unigenito  non  pepercerit,  quam  effusam  bonitatis  et  gratiae  magnitudinem  illic  conspicimus?  Quisquis  ergo  mortis  Christi  causas  rite  expendet  una  cum  fructu,  qui  inde  ad  nos  redit,  illi  neque  stultitia  ut  Graecis,  neque  scandalum  ut  Iudaeis  erit  crucis  doctrina  (1.  Cor.  1,  23),  sed  potius  inaestimabile  divinae  tum  virtutis,  tum  sapientiae,  tum  iustitiae,  tum  bonitatis  specimen  ac  pignus.  Quum  dicit  Ioannes  loco  nomen  fuisse  Golgotha,  de  lingua  vel  chaldaea  vel  syriaca  accipit.  Est  autem  nomen  deductum  a  galgal,  hoc  est  a  volvendo,  quia  in  cranio  est  velut  pilae  aut  globi  rotunditas.  19.  Scripsit  autem  et  titulum.  Inserit  evangelista  memorabile  Pilati  factum  post  latam  sententiam.  Usitatum  quidem  forte  fuit  titulos  apponere,  quum  plecterentur  malefici,  ut  poenae  causa  in  exemplum  omnibus  nota  esset.  Atqui  in  Christo  hoc  extraordinarium  est  quod  sine  ignominia  titulus  apponitur.  Pilati  enim  consilium  fuit,  quo  se  oblique  ulcisceretur  de  Iudaeis,  qui  sua  pervicacia  iniustum  de  homine  innoxio  supplicium  extorserant,  totam  gentem  in  Christi  persona  damnare.  Ita  Christo  nullam  proprii  sceleris  notam  inurit.  Verum  longe  altius  prospexit  Dei  providentia,  quae  Pilati  stylum  gubernavit.  Non  venit  quidem  Pilato  in  mentem  celebrare  Christum,  ut  salutis  autorem,  et  Dei  Nazarenum  et  regem  electi  populi:  Deus