37:414  rum  asylum,  hoc  omnium  malorum  remedium  est.  Atque  ideo  Moses  aliique  prophetae  toties  id  inculcant.  9.  (Urbes  sanctitatis.)  Iterum  miserias  recenset  ecclesia  ut  Deum  ad  misericordiam  flectat  veniamque  obtineat.  Urbes  in  solitudinem  redactas  esse  dicit:  atque  amplificationis  causa  addidit  Sion  desertum,  quoniam  sedes  erat  regia  in  qua  Deus  volebat  invocari.  Addit  etiam  Ierosolymam  in  qua  Sion  erat:  quoniam  videbatur  indignum  diripi  ab  hostibus  ac  deleri  civitatem  quam  Deus  sibi  consecrarat.  Urbes  sanctitatis  vocat  quoniam  ut  populum  sanctificaverat  Dominus:  ita  etiam  urbes,  imo  totam  regionem  volebat  sibi  consecratam  esse.  Urbes  igitur  quum  dicatae  Deo  essent,  merito  vocantur  sanctitatis  eius:  quoniam  in  iis  regnabat  Deus  atque  invocabatur.  Eodem  modo  possumus  hodie  appellare  urbes  sanctitatis  Dei,  quae  reiectis  superstitionibus  puro  et  sincero  ritu  ipsum  adorant.  10.  (Domus  sanctuarii  nostri.)  Sanctuarium  alia  ratione  vocatur  populi  quam  Dei.  Nam  quia  testimonium  erat  sacrae  inter  Deum  et  populum  coniunctionis,  saepe  dicitur  sancta  Dei  domus  quae  scilicet  eius  sanctitati  respondeat  :  nunc  passive  nominant  fideles  suum  sanctuarium,  quia  inde  illis  petenda  erat  sanctificatio:  idque  apertius  confirmant  per  vocem  gloriae.  Fatentur  se  nihil  habere  in  quo  glorientur  praeter  templum,  in  quo  adorari  et  coli  Deus  volebat.  Et  tamen  videmus  saepe  inanem  fuisse  hanc  gloriationem,  atque  ideo  reprehendi  a  Ieremia  (7,  4):  Ne  confidatis  verbis  mendacii  dicentes  Templum  Domini,  templum  Domini.  Sed  ut  praepostera  erat  eorum  gloria  qui  efferebantur  inanibus  titulis,  atque  insolescebant:  ita  vera  et  solida  eorum  erat  qui  institutum  Domini  animo  comprehendebant,  et  verbi  testimonio  freti  sciebant  se  habitare  sub  eius  umbra,  qui  sibi  familiare  domicilium  inter  eos  erexerat.  Nam  exstructum  iussu  Domini  templum  erat,  ut  merito  gloriari  in  eo  possent  Iudaei,  quod  Deum  haberent  praesidem  suae  salutis.  Quia  vero  tunc  corruptus  atque  adulteratus  fuerat  cultus  Dei,  omnesque  propemodum  ad  superstitionem  et  impietatem  desciverant,  ideo  prioris  saeculi,  non  praesentis  mentionem  facit,  ac  si  diceret:  Tametsi  eum  quem  decebat  cultum  nos  tibi  non  exhibuimus,  tamen  hoc  templum  est  in  quo  te  patres  pure  coluerunt:  an  profanari  ipsum  sines  ac  deleri?  Annon  in  te  haec  ignominia  recidet,  quum  ad  cultum  nominis  tui  pertineat?  Tacent  hic  Iudaei  de  sua  vita,  nec  excusationes  afferunt,  potius  fatentur  culpam:  sed  obiiciunt  Deo  cultum  ipsius,  ut  memor  sit  foederis,  nec  promissa  sua  irrita  esse  patiatur.  Quod  exemplum  piis  omnibus  imitandum  est.  Laudandi  verbum  pro  gratulatione  accipitur:  ac  si  diceret,  in  eo  templo,  cuius