54:412  par  chacune  ville.  Car  ce  mot  de  Prestres,  qu'il  met,  signifie  autant  qu'Anciens.  Non  pas  que  tous  ceux  qui  estoyent  appelez  a  cest  office,  fussent  vieilles  gens  d'aage:  car  nous  ayons  veu  que  Timothee,  qui  estoit  du  nombre,  voire  des  plus  excellens,  estoit  ieune  homme:  et  quand  sainct  Paul  l'a  ordonne,  il  n'a  point  neantmoins  perverti  l'ordre  de  Dieu,  mais  c'est  un  langage  tout  accoustume  en  l'Escriture  saincte,  que  les  gouverneurs  mesmes  estoyent  appelez  Anciens,  combien  qu'ils  ne  fussent  point  d'Eglise,  mais  pource  qu'ils  desvoyent  avoir  prudence,  et  gratuite,  et  qu'ils  devoyent  mesmes  estre  tellement  rassis,  qu'ils  fussent  comme  s'ils  estoyent  desia  vieux.  Voila  pourquoy  ce  titre  leur  a  este  attribue  de  tout  temps.  Or  maintenant  ceste  canaille  de  Prestrise,  qu'on  a  appele  en  la  Papaute,  est  ridicule,  voire  infame:  mais  si  ne  faut-il  point  pourtant  s'ils  ont  rendu  ce  mot  odieux  et  infame  (comme  i'ay  dit),  que  ce  qui  est  usite  en  l'Escriture  saincte,  soit  comme  reiette.  Car  c'est  un  nom  sacre  de  soy  que  Prestre:  toutesfois  il  vaudroit  mieux  estre  pendu  au  gibet,  que  d'estre  prestre  papal.  Car  c'est  une  execration  si  vileine,  qu'il  les  faut  tenir  comme  bourreaux  de  Iesus  Christ,  car  ils  le  crucifient  tous  les  iours,  entant  qu'en  eux  est.  Mais  d'estre  Prestre  chrestien,  c'est  autre  chose.  Nous  voyons  donc  maintenant  a  quoy  sainct  Paul  a  pretendu  en  ce  passage:  nous  voyons  aussi  que  ce  n'est  point  assez  que  l'Evangile  se  presche  en  un  lieu  pour  quelque  peu  de  temps,  mais  que  la  doctrine  doit  continuer  iusques  en  la  fin.  Et  pourquoy?  Car  nous  ne  serons  pas  amenez  a  la  perfection  incontinent:  et  puis  il  faut  que  ce  qui  a  este  une  fois  dresse  soit  entretenu  iusques  au  bout.  Et  ainsi  nous  avons  besoin  que  par  tout  il  y  ait  des  Pasteurs,  ou  des  Prestres  qui  succedent  l'un  a  l'autre,  et  que  ceux-la  conferment  tousiours  les  fideles,  et  qu'ils  les  facent  profiter  en  l'escole  de  nostre  Seigneur  Iesus  Christ,  et  qu'ils  servent  aux  grans  et  aux  petis,  et  aux  vieux  et  aux  ieunes,  et  qu'ils  travaillent  tant  qu'il  leur  sera  possible,  que  la  verite  de  Dieu  demeure,  et  qu'elle  continue,  et  que  de  main  en  main  ils  la  facent  venir  iusques  a  ceux  qui  doivent  vivre  apres  nous.  Maintenant  puis  que  nous  avons  cela,  regardons  a  ce  mot  que  sainct  Paul  met  ici:  Ie  fay  laisse  afin  que  tu  corriges  et  paracheves  les  choses  qui  defaillent  et  restent  a  accomplir  encores.  Ce  mot  dont  use  sainct  Paul,  signifie  proprement  Correction,  mais  il  signifie  aussi  Achever.  Or  il  n'entend  pas  que  Tite  deust  corriger  en  changeant  toutes  les  choses  que  sainct  Paul  avoit  mises  des  le  commencement,  et  qui  estoyent  bonnes  et  sainctes,  et  n'y  avoit  que  redire  :  mais  d'autant  qu'il  avoit  commence  l'edifice,  il  le  faloit  poursuivre  et  avancer.  Ainsi  donc  il  a  falu  que  Tite  corrigeast  ce  qui  de-