47:412  Non  es  amicus  Caesaris.  Minaciter  extorquent  a  Pilato  ut  Christum  damnet.  Nihil  enim  magis  odiosum^  obiicere  poterant  et  quod  plus  terroris  posset  incutere,  quam  dum  suspectum  reddunt  malae  in  Caesarem  fidei.  Tu,  inquiunt,  ostendis  tibi  curae  non  esse  Caesaris  imperium,  si  eum  absolvis,  qui  omnia  turbare  conatus  est.  Haec  tandem  improbitas  fregit  animum  Pilati,  qui  ante  concussus  tantum  fuerat  violentis  clamoribus.  Nec  vero  frustra  istas  circumstantias  evangelista  tam  sedulo  persequitur  et  inculcat,  quia  nostra  magnopere  interest,  Christum  scire  non  prius  fuisse  damnatum  a  Pilato,  quam  ter  et  quater  iam  absolutus  esset  eiusdem  ore:  ut  inde  colligamus,  non  suo  ipsum  nomine  fuisse  damnatum,  sed  pro  nostris  peccatis.  Inde  etiam  colligere  licet,  quam  voluntarius  ad  subeundam  mortem  fuerit,  qui  uti  neglexit  propenso  illo  in  se  iudicis  affectu.  Et  certe  haec  obedientia  effecit,  ut  mors  eius  boni  odoris  sacrificium  esset  expiandis  omnibus  peccatis.  13.  Sedit  pro  tribunali.  Hinc  apparet  quam  varie  distractus  fuerit  Pilatus,  ac  si  histrio  unus  duas  ageret  personas.  Conscendit  tribunal,  ut  Christum  solenni  more  supplicio  addicat:  interea  palam  declarat,  se  hoc  invitum  facere  et  repugnante  conscientia.  Ironice  Christum  vocat  regem,  significans  frivolam  esse  calumniam,  qua  gravabant  illum  Iudaei:  vel  certe  ut  compescat  eorum  furorem,  probrosum  hoc  toti  genti  fore  admonet,  si  rumor  vulgatus  fuerit,  fuisse  ex  ea  damnatum  aliquem  regni  affectati  crimine.  Quum  evangelista  nomen  hebraicum  loci  Gabbatha  fuisse  refert,  linguam  chaldaeam  intelligit  vel  syriacam,  quae  tunc  in  communi  usu  erat:  Gabba  enim  Hebraeis  excelsum  significat.  E  sublimi  itaque  loco  damnari  Christum  oportuit,  ut  ipse  summus  iudex  e  coelo  adveniens  nos  extremo  die  absolvat.  14.  Hora  fere  sexta.  Videntur  evangelistae  in  tempore  notando  varii  esse  et  parum  inter  se  consentientes.  Dicunt  tres  alii  tenebras  ab  hora  sexta  factas  esse,  quum  iam  in  cruce  penderet  Christus.  Marcus  etiam  diserte  exprimit  horam  fuisse  tertiam,  quum  de  eo  lata  fuit  sententia.  Solutio  tamen  non  est  difficilis.  Satis  patet  ex  aliis  locis,  diem  tunc  in  quatuor  partes  fuisse  divisum,  sicuti  nox  vicissim  quatuor  habebat  vigilias.  Hinc  factum  est,  ut  singulis  diebus  quaternas  tantum  horas  interdum  assignent  evangelistae,  et  singulas  horas  in  tres  extendant.  Interea  spatium  unius  horae,  quod  ad  finem  inclinat,  sequenti  annumerant.  Secundum  hanc  supputationem  Ioannes  hora  sexta  damnatum  fuisse  Christum  narrat,  quia  tempus  diei  ad  horam  sextam  vel  ad  secundam  partem  vergebat.  Hinc  colligimus  hora  sexta  vel  circiter  Christum  fuisse  crucifixum.  Locus  enim,  ut  paulo  post  dicet,  erat  urbi  vicinus.  Inter  sextam  et  nonam  coeperunt  tenebrae,