47:411  411  IN  EVANGELIUM  IOANNIS  412  iudicio  sentiunt,  qui  locum  hunc  restringunt  ad  magistratus  officium.  Stultam  enim  Pilati  arrogantiam  castigat  Christus  his  verbis,  quia  perinde  se  extollat  tanquam  potestas  eius  non  a  Deo  esset,  ac  si  dixisset:  Tu  omnia  perinde  tibi  sumis,  ac  si  non  semel  Deo  reddenda  esset  ratio.  Atqui  non  sine  eius  providentia  factus  es  iudex.  Cogita  ergo  coeleste  eius  tribunal  tuo  esse  superius.  Nulla  aptior  admonitio  inveniri  potest  ad  reprimendam  eorum  intemperiem,  qui  aliis  praesunt,  ne  iure  suo  abutantur.  Pater  omnia  sibi  licere  in  filios  putat,  maritus  in  uxorem,  dominus  in  servos,  princeps  in  populum,  nisi  quum  in  Deum  respiciunt,  qui  certa  lege  eos  dominari  voluit.  Propterea  qui  me  tradidit  Putant  Iudaeos  maioris  culpae  reos  fieri  quam  Pilatum,  quia  scelerato  odio  et  perfida  malitia  contra  iustum  grassentur,  et  quidem  privati  homines,  nec  legitimo  imperio  praediti.  Ego  vero  aliter  hac  circumstantia  gravius  et  minus  excusabile  esse  eorum  crimen  existimo,  quia  imperium  divinitus  constitutum  suae  libidini  servire  cogunt.  Magnum  enim  sacrilegium  est  sancta  Dei  ordinatione  ad  quodvis  nefas  abuti.  Iure  detestabilis  est  latro,  qui  miserum  viatorem  iugulat  manu  sua,  sed  qui  praetextu  iudicii  insontem  occidit,  magis  sceleratus.  Caeterum  non  amplificat  illorum  crimen,  ut  Pilatum  sublevet:  neque  enim  hunc  cum  illis  comparat,  quin  potius  eodem  reatu  simul  omnes  constringit,  quia  sanctam  potestatem  pariter  contaminant.  Hoc  tantum  est  discrimen,  quod  directe  petit  Iudaeos:  Pilatum  vero,  qui  obsequitur  eorum  libidini,  oblique  taxat.  12.  Ex  eo  quaerebat  Pilatus  dimittere  eum.  Iudaei  autem  clamabant,  dicentes:  Si  hunc  dimittis,  non  es  amicus  Caesaris:  quisquis  se  regem  facit,  contradicit  Caesari.  13.  Pilatus  ergo,  quum  audisset  hunc  sermonem,  adduxit  foras  Iesum  et  sedit  pro  tribunali,  in  loco  qui  dicitur  Lapidibus  stratus,  hebraice  autem  Gabbatha.  14.  Erat  autem  parasceue  paschae,  hora  fere  sexta:  et  dicit  Iudaeis:  Ecce  rex  vester.  15.  Illi  autem  clamarunt:  Tolle,  tolle,  crucifige  eum.  Dicit  illis  Pilatus,  regem  vestrum  crucifigam?  Responderunt  sacerdotes:  Non  habemus  regem  nisi  Caesarem.  16.  Tunc  ergo  tradidit  eum  illis  ut  crucifigeretur.  Acceperunt  autem  Iesum  et  abduxerunt  12.  Ex  eo  quaerebat  Pilatus.  Quamvis  nec  cordate  se  gerat  Pilatus  et  ambitione  magis  quam  iustitiae  studio  regatur  ideoque  misere  vacillet,  laudanda  tamen  eius  modestia,  quod  severe  a  Christo  reprehensus  non  succenset,  imo  ad  eum  liberandum  magis  inclinat.  Iudex  est,  et  tamen  mansueto  animo  reum  patitur  esse  censorem  suum.  Vix  certe  centesimus  quisque  reperietur,  qui  obiurgationem  tam  placide  ab  aliquo  aequali  suo  ferat.