8:410  que  nous  soyons  enseignez  par  sa  parolle,  que  nous  l'adorions  tous  d'un  commun  accord,  et  l'invoquions,  que  nous  ayons  l'usage  des  Sacremens  pour  nous  aider  a  cela.  Car  voyla  comme  il  nous  fault  exercer  pour  estre  de  mieulx  en  mieulx  confermez  en  la  foy,  en  la  crainte  de  Dieu,  en  sainctete,  au  mespris  de  ce  monde,  et  en  l'amour  de  la  vie  celeste.  Et  c'est  aussi  a  ce  propos  que  David  proteste  qu'il  a  sur  tout  desire  d'habiter  au  Temple  de  Dieu.  Car  soubs  ce  mot  de  Temple  il  comprend  la  liberte  de  povoir  adorer  Dieu  purement  avec  les  fideles,  faire  confession  de  sa  foy,  prier,  et  participer  aux  Sacremens.  Car  pour  ce  temps-la  Dieu  avoit  choisi  un  lieu  certain,  auquel  il  vouloit  qu'on  luy  sacrifiast,  qu'on  lui  feist  hommage,  protestant  qu'on  le  tenoit  pour  seul  Dieu,  qu'on  fust  instruict  en  sa  Loy,  et  qu'on  eust  les  tesmoignages  de  sa  presence.  Et  de  faict,  il  exprime  assez  quel  regard  il  ha,  en  desirant  d'habiter  au  Temple,  quand  il  adiouste  que  c'est  pour  veoir  la  beaute  de  Dieu.  En  quoy  il  monstre  que  le  temple  de  soy  n'estoit  rien,  mais  qu'il  s'arrestoit  a  l'usage  auquel  il  estoit  desdie.  Si  nous  pensions  qu'il  se  fust  amuse  a  un  bastiment  materiel,  nous  luy  ferions  grand  tort  et  iniure  :  car  cela  luy  seroit  impute  a  superstition,  [f.  40]  non  pas  attribue  a  vertu.  Nous  debvons  doncques  estre  resolus  qu'il  declare  en  quelle  recommandation  il  ha  l'ordre  exterieur  par  lequel  les  fideles  sont  conduicts  en  l'Eglise.  En  somme,  il  signifie  que  c'est  un  bien  et  privilege  inestimable  d'estre  en  l'Eglise  de  Dieu,  pour  estre  participans  des  moyens  que  ce  bon  Pere  a  donnez  a  ses  enfans  pour  approcher  de  luy.  Notons  bien  quel  est  celuy  qui  parle.  Ce  n'est  pas  un  povre  idiot,  rude  et  grossier,  mais  un  Prophete  aussi  excellent  et  illumine  du  sainct  Ea-