37:410  Nam  in  reputandis  Dei  operibus  hoc  solenne  piis  ac  tritum  est,  ut  a  specie  una  ad  totum  genus  transeant.  Ita  unum  hoc  tam  insigne  divinae  bonitatis  exemplum  prophetae  mentem  altius  rapere  potuit,  ut  immensam  illam  bonorum  affluentiam,  quae  fidelibus  in  coelo  est  recondita,  secum  volveret!  Imo  clare  perspicimus,  sub  hoc  elogio  comprehendi  foedus  gratuitum  quo  sibi  filios  Abrahae  in  spem  aeternae  vitae  Deus  adoptavit.  Summa  huc  redit,  quum  tanta  sit  Dei  bonitas  et  potentia,  non  est  quod  ei  diffidamus:  sed  ita  reposita  in  eo  esse  debet  fiducia  nostra,  ut  speremus  eum  certo  adfuturum  esse.  Atque  huc  spectant  beneficia  illa  praeclara  quae  hic  a  propheta  commemorantur.  4.  (Occurristi.)  Pergit  in  eodem  argumento.  Deplorat  enim  populus  fortunam  suam,  quod  in  adversis  nihil  sentiat  allevationis,  quum  tamen  patribus  olim  Deus  manum  porrigere  solitus  esset.  Loquuntur  ergo  fideles  in  hunc  modum:  Solebas  occurrere  patribus  nostris,  nunc  facies  tua  a  nobis  aversa  est:  et  quia  te  invocando  nihil  proficimus,  videris  inexorabilis:  unde  ista  varietas,  quasi  mutata  natura  alius  nunc  esses  quam  fuisti?  Subiungunt  deinde,  et  fatentur  se  merito  poenas  dare,  quia  peccarunt.  Prius  admonui  nihil  omnino  melius  esse  in  adversis,  quam  si  beneficiorum  Dei  recordemur:  nec  eorum  tantum  quae  ipsi  experti  sumus,  sed  etiam  quae  a  scriptura  referuntur.  Nec  enim  firmiore  clypeo  muniri  possumus  adversus  omnis  generis  tentationes.  Perperam  hunc  versum,  meo  iudicio,  exponunt,  qui  haec  coniunctim  legenda  putant,  laetanti  et  facienti  iustitiam:  quasi  dixisset,  Occurristi  iis  qui  voluntarie  tibi  serviunt,  et  quibus  summa  voluptas  est  recte  agere.  Existimo  enim  laetantes  hic  vocari  eos  qui  rebus  prosperis  gaudebant:  quia  tunc  populus  in  luctu  ac  moerore  erat.  Subest  enim  tacita  antithesis:  Olim  solebas  occurrere  patribus,  antequam  ullo  incommodo  premerentur,  eosque  adventu  tuo  exhilarare:  nunc  longe  abes,  nosque  moerore  et  luctu  contabescere  sinis.  Eodem  pertinet  quod  addit  recordatos  fuisse  Dei,  quia  praesenti  eius  gratia  fruebantur,  eumque  sentiebant  autorem  ac  praesidem  suae  salutis.  Atque  ita  per  vias  Dei  res  prosperas  intelligit:  sive  quod  hoc  modo  propinquus  illis  erat  quum  molliter  ac  delicate  velut  filios  tractaret:  sive  quia  Deus  ad  beneficentiam  propensus  est  natura.  Sed  quoniam  dixit  Deum  occurrere  solitum  facienti  iustitiam,  recordatio  ad  studium  pietatis  referri  potest,  quod  scilicet  sedulo  ad  Deum  colendum  se  addixerint.  Atque  ita  explicatio  erit  superioris  membri.  Solent  enim  prophetae  pluribus  confirmare  quod  semel  dixerunt.  Becordari  Dei  est  suavi  eius  memoria  sic  allici,  ut  nos  nihil  magis  optemus  atque  in  eo  felicitatem  nostram  constituere.  Nihil  enim  est  quod  nos  magis  delectet,  quam  divinae  clementiae