40:41  41  IN  EZECHIELIS  PROPH.  CAP.  I.  42  non  fuisset  diversa  a  formis  vulgaribus,  visio  non  ita  prophetae  mentem  in  admirationem  traxisset.  Ergo  oportuit  misceri  aliquid  coeleste  terrenis  figuris.  Haec  ratio  est  cur  animalia  fuerint  tanquam  ignis  accensus.  Nunc  ergo  tenemus  quorsum  spectet  haec  diversitas:  quemadmodum  ubi  Deus  Mosi  apparuit,  si  nihil  fuisset  admirabile,  non  putasset  Moses  se  a  Deo  vocari  :  sed  agnovit  Deum  in  rubo,  quia  videbat  rubum  ardere,  neque  consumi.  Tunc  ergo  coepit  expergefieri,  et  reputare  sibi  offerri  divinitus  illam  visionem.  Hoc  etiam  diligenter  observandum  est  in  hoc  loco.  Et  inde  etiam  colligimus  quam  humaniter,  imo  indulgenter  nobiscum  agat  Deus.  Nam  ab  una  parte  videt  quam  exiguus  sit  noster  modulus,  ideo  ad  nos  descendit:  hinc  facies  animalium,  hinc  statura  corporis,  et  quae  ante  retulimus.  Iam  vero  quia  videt  nos  torpere  in  terra,  et  quasi  iacere  ignavos,  ideo  nos  attollit:  et  huc  tendit  quod  nunc  narrat  Ezechiel,  nempe  adspectum  animalium  similem  fuisse  carbonibus  ignitis.  Et  quoniam  carbones  qui  ab  igne  sunt  extracti  aliquando  exstinguuntur,  dicit  carbones  illos  fuisse  ardentes.  Necesse  igitur  fuit  prophetam  moveri  quum  videret  animalia  non  esse  animalia,  hoc  est  quum  videret  in  forma  animalium  esse  aliquid  coeleste,  et  quod  excederet  naturae  modum,  et  superaret  etiam  humanos  sensus:  hoc  etiam  reliquis  profuit.  Nam  quum  legimus  hanc  visionem,  agnoscimus  ita  patefactum  fuisse  prophetae  quod  narrat,  ut  tamen  Deus  illic  resplenduerit,  neque  passus  fuerit  prophetam  suum  ambigere.  Hinc  nobis  melius  confirmatur  eius  doctrina,  quae  tam  certis  indiciis  obsignata  est.  Interea  etiam  memoria  repetere  convenit  quod  heri  diximus,  in  hac  visione  fuisse  aliquid  terrificum,  quoniam  populus  ad  omnes  minas  obduruerat,  imo  ad  plagas  ipsas.  Deus  enim  iam  exercuerat  severa  iudicia  non  modo  contra  regnum  Israelis,  sed  contra  ipsam  urbem,  et  totam  terram  Iehudah.  Captivi  tamen  mordebant  fraenum,  et  fremebant,  quod  fuissent  in  exsilium  tracti:  interea  qui  in  urbe  substiterant,  putabant  praeclare  secum  fuisse  actum.  Quia  ergo  tanta  erat  securitas,  ideo  necesse  fuit  terrorem  illis  proponi:  ut  paulo  post  etiam  videbimus.  Et  dicitur  etiam  ignis  ardere  coram  Deo,  ubi  non  tantum  vult  conspici  a  nobis  suam  gloriam,  sed  ubi  vult  incutere  formidinem,  sicuti  fecit  in  promulgatione  legis.  Et  David  Psalmo  18  narrat  Deum  hoc  modo  sibi  apparuisse,  quum  ab  eo  servatus  est:  haud  dubie  intelligit  Deum  explicuisse  formidabilem  suam  potentiam  adversus  incredulos.  Sic  etiam  hoc  loco  dicit  adspectum  animalium  fuisse  similem  carbonibus  ignitis  et  ardentibus:  deinde  addit  alteram  similitudinem,  quod  similes  fuerint  lampadibus:  quanquam  exponunt  quidam  titiones,  vel  lignum  accensum.  Sed  altera  sententia  receptior  est,  et  mihi  magis  probatur.  Formam  ergo  ignis  clarius  nunc  exprimit