24:41  41  COMMENTARIUS  IN  EXODI  CAP.  III.  42  10.  Veni  itaque.  Postquam  servum  suum,  quo  se  alacrius  ad  opus  accingeret,  promissionibus  Deus  instruxit,  nunc  addit  mandata,  eumque  ad  munus  cui  destinatus  est  obeundum  vocat.  Atque  haec  optima  est  ad  officium  animandi  ratio,  ubi  Deus  certiores  de  prospero  successu  reddit  qui  dubitatione  segnes  alioqui  essent.  Nam  etsi  simplicibus  Dei  iussis  absque  haesitatione  et  mora  obtemperandum  est  :  tarditati  tamen  nostrae  consulere  volens,  promittit  non  vanos  fore  nec  inutiles  nostros  conatus.  Et  certe  hoc  omnibus  naturaliter  est  ingenitum  ut  fiducia  prosperi  exitus  ad  agendum  incitentur.  Ac  proinde,  quamvis  Deus  interdum  servos  suos,  probandae  ipsorum  obedientiae  causa,  spe  destituens,  praecise  iubeat  hoc  vel  illud  facere;  saepius  tamen  felicem  eventum  pollicendo,  cunctationem  eximit.  Sic  igitur  nunc  spe  redemptionis  proposita  Mosen  ad  iussa  exsequenda  erexit.  Ideo  copula  in  particulam  illativam  resolvi  debet:  quia  a  promissione  haud  dubie  pendet  mandatum  et  vocatio.  11.  Quis  sum  ego.  Quod  imbecillitatis  suae  conscius,  se  non  esse  idoneum  respondet,  atque  ita  provinciam  detrectat,  nondum  inobedientiae  fieri  potest  reus.  Comparatio  eius  cum  Pharaone  augebat  recusandi  praetextum.  Modestiae  itaque  et  humilitatis  videtur  esse  haec  excusatio.  Ego  certe  non  modo  culpa  vacare,  sed  laude  dignam  esse  arbitror.  Nec  obstat  quod  Deum  sibi  autorem  sciebat  esse  tam  ardui  operis.  Miratur  enim,  quando  in  Dei  manu  tot  sunt  millia,  non  alium  potius  deligi.  Sed  alia  nascitur  quaestio,  cur  nunc  timide  sufficere  se  neget  ad  liberandum  populum,  qui  quadraginta  ante  annis  adeo  promptus  fuerat  in  occidendo  Aegyptio:  dum  vocatione  Dei  fretus  tam  periculosum  facinus  ausus  est.  Vigorem  ipsius  senio  refrixisse  (sicuti  naturaliter  fervidi  sunt  iuvenes,  aetas  autem  frigus  et  cunctationem  affert)  probabile  non  videtur.  Sed  alio  vitio  laborasse  apparet,  quod  principio  non  satis  se  ipsum  excutiens,  neque  facultates  suas  vel  negotii  magnitudinem  aestimans,  confestim  properavit.  Quanquam  autem  laude  digna  est  talis  festinatio,  saepe  tamen  in  medio  cursu  deficit,  quemadmodum  fructus  praecoces  vel  ad  maturitatem  non  perveniunt,  vel  non  diu  permanent.  Quamvis  ergo  generosae  indolis  specimen  praebuerit  Moses,  quum  Deo  suam  operam  festinanter  impendit:  nondum  tamen  ea  constantia  instructus  erat  quae  eum  ad  finem  usque  fulciret:  quia  fides  quae  in  eius  corde  florebat,  nondum  egerat  satis  profundam  radicem,  nec  ipse  penitus  examinaverat  quid  posset.  Itaque  in  rem  praesentem  adductus  trepidat,  qui  difficultate  nondum  perspecta  fuerat  confidentior.  Ita  quotidie  nos,  qui  extra  telorum  iactum  videmur  nobis  probe  animati,  tandem  ubi  cominus  pugnandum  est  expavescimus:  quia  sentire  incipimus  pericula  quae  nos  procul  non  movebant.  Nihil