2:41  [CO  2.41]  appareant.  Ubi  enim  perpetuus  obedientiae  tenor  in  tota  vita  esse  debuerat,  in  cunctis  fere  operibus  secure  illi  rebellantes,  pauculis  tantum  sacrificiis  placare  eum  student;  ubi  sanctimonia  vitae  et  cordis  integritate  illi  serviendum  erat,  frivolas  nugas  comminiscuntur,  et  nihili  observatiunculas  quibus  eum  sibi  concilient.  Imo  maiore  licentia  in  faecibus  suis  torpent,  quia  confidunt  expiationum  ludicris  se  posse  erga  illum  defungi;  deinde  ubi  in  illum  defixa  esse  fiducia  debuerat,  in  se  vel  creaturis  subsidunt,  eo  posthabito.  Tandem  se  tanta  errorum  congerie  implicant,  ut  scintillas  illas,  quae  micabant  ad  cernendam  Dei  gloriam,  suffocet,  ac  demum  exstinguat  malitiae  caligo.  Manet  tamen  semen  illud  quod  revelli  a  radice  nullo  modo  potest,  aliquam  esse  divinitatem;  sed  ipsum  adeo  corruptum,  ut  non  nisi  pessimos  ex  se  fructus  producat.  Imo  inde  certius  elicitur  quod  nunc  contendo,  naturaliter  insculptum  esse  deitatis  sensum  humanis  cordibus,  quia  reprobis  quoque  ipsis  eius  confessionem  extorquet  necessitas.  Rebus  tranquillis  facete  illudunt  Deo,  imo  ad  extenuandam  eius  potentiam  dicaces  sunt  ac  garruli.  Desperatio  si  qua  eos  urget,  ad  eundem  quaerendum  exstimulat,  dictatque  concisas  preces,  ex  quibus  pateat  non  prorsus  ignaros  fuisse  Dei,  sed  quod  citius  emergere  debuerat,  fuisse  pervicacia  suppressum.  CAPUT  V.  Dei  notitiam  in  mundi  fabrica  et  continua  eius  gubernatione  lucere.  [Inst  1.5.1.]  Ad  haec,  quia  ultimus  beatae  vitae  finis  in  Dei  cognitione  positus  est,  ne  cui  praeclusus  esset  ad  felicitatem  aditus,  non  solum  hominum  mentibus  indidit  illud  quod  diximus  religionis  semen,  sed  ita  se  patefecit  in  toto  mundi  opificio,  ac  se  quotidie  palam  offert,  ut  aperire  oculos  nequeant  quin  aspicere  eum  cogantur.  Essentia  quidem  eius  incomprehensibilis  est,  ut  sensus  omnes  humanos  procul  effugiat  eius  numen;  verum  singulis  operibus  suis  certas  gloriae  suae  notas  insculpsit,  et  quidem  adeo  claras  et  insignes  ut  sublata  sit  quamlibet  rudibus  et  stupidis  ignorantiae  excusatio.  Ideo  optimo  iure  propheta  (Psal.  104,  2)  exclamat,  luce  quasi  vestimento  ipsum  esse  amictum;  ac  si  diceret,  coepisse  tunc  demum  visibili  ornatu  insignem  prodire  ex  quo  in  mundi  creatione  sua  insignia  protulit,  quibus  nunc  quoties  oculos  huc  vel  illuc  circumferimus,  decorus  apparet.  Ibidem  etiam  scite  idem  propheta  coelos  ut  expansi  sunt  regio  illius  tentorio  comparat,  coenacula