11:41  1540  MAL  non  displiceret  ut  aliquantulum  adhuc  ea  res  differatur.  Quod  examen  illud  nostrum,  de  quo  scripsi,  bono  fratri  scrupulum  iniecit,  nihil  miror.  Neque  enim  novum  est  bonos  animos  formidare  ne  quam  in  superstitionem  relabamur,  quoties  audiunt  nos  aliquid  statuere  quod  ullam  vel  affinitatem  vel  similitudinem  habet  cum  papisticis  figmentis.  Verum  ut  illam  sollicitudinem  excutere  illis  nolim  (non  enim  possumus  hac  parte  iusto  esse  intentiores),  ita  optarim  illos  in  seligendo  a  paleis  et  quisquiliis  tritico  paulo  esse  diligentiores.  Saepe  id  tibi  testatus  sum,  non  videri  mihi  utile  esse  ecclesiis  abrogari  confessionem,  nisi  id  quod  nuper  institui  in  eius  locum  subrogetur.  Quo  rationem  meam  tibi  melius  exponam,  prius  obiter  demonstrandum  est,  quale  illud  sit.  Quum  instat  dies  coenae  edico  ut  qui  communicare  cupiunt  prius  se  mihi  repraesentent,  simul  adiungo  in  quem  finem,  ut  qui  rudes  sunt  adhuc  et  religionis  imperiti  melius  formentur,  deinde  ut  qui  opus  habent  speciali  monitione  eam  audiant,  postremo  ut  si  qui  aliqua  conscientiae  inquietudine  torqueantur  consolationem  accipiant  Quoniam  autem  periculum  est  ne  plebs,  quae  non  satis  discernit  inter  Christi  iugum  et  Antichristi  tyrannidem,  se  in  novam  servitutem  redigi  putet,  huic  dubitationi  etiam  occurro.  Confessionem  papisticam  non  tantum  mihi  improbari  testor,  sed  rationes  palam  ostendo  cur  displiceat:  deinde  in  genere  pronuncio,  non  tantum  a  superstitionibus  illis  abhorrendum  esse  quibus  implicita  fuit,  sed  nullam  omnino  ferendam  esse  legem  quae  conscientias  laqueis  astringat.  Christum  enim  unicum  esse  nostrum  legislatorem  cui  simus  debitores.  Postea  doceo,  nihil  hic  derogari  libertati  nostrae,  quando  nihil  penitus  iniungo  quod  non  Christus  ipse  praescripserit.  Quantae  enim  impudentiae  esset  non  dignari  fidem  tuam  ecclesiae  approbare,  cuius  communionem  petis?  et  quam  misera  erit  ecclesiae  conditio,  si  in  tanti  mysterii  participationem  recipere  cogatur  quos  vel  penitus  ignorat,  vel  forte  suspectos  habet?  Atque  ut  de  ecclesia  taceam,  minister  ipse,  cui  hac  lege  demandata  est  huius  gratiae  dispensatio  ne  eam  canibus  ac  porcis  prostituat,  ne  temere  dignis  simul  ac  indignis  nullo  delectu  profundat,  quomodo  hoc  onere  defungetur,  nisi  certam  aliquam  dignos  ab  indignis  discernendi  rationem  ineat?  Sed  ego  ineptus  sum  qui  haec  apud  te  longius  prosequor.  Praeterea  tempus  quoque  me  deficeret.  Accidit  enim  quod  verebar,  me  non  semel  a  scriptione  avocari.  Postremo  loco  necessitatem  huius  ordinis  utilitatemque  declaro,  quam  tu  velut  a  me  explicatam  bono  viro  referes.  Tres  illi  nobiles  adulescentes  quos  hospitio  excepisti,  eo  magis  comitatem  liberalitatemque  tuam  commendant,  quo  diligentius  excusas,  te  minus  quod