1:41  [CO  1.  41]  MANDATUM  X.  Non  concupisces  domum  proximi  tui,  non  desiderabis  uxorem  eius,  non  servum,  non  ancillam,  non  bovem,  non  asinum,  neque  omnia  quae  illius  sunt.  Quo  Dominus,  quem  timeri  a  nobis  atque  amari  decet,  omne  desiderium  alienae  uxoris,  familiae,  possessionum,  aut  cuiusvis  boni  interdicit.  Qua  ratione  multo  magis  vetat,  ne  quas  insidias,  ne  quam  fraudem [p. 70]  aut  artem,  etiamsi  honesto  nomine  praetexi  possit,  intendamus,  qua  vel  uxor  e  mariti  consortio  exeat,  vel  servi  eius  manu  se  subducant,  vel  alia  bona  illi  excutiantur;  ne  uxorem  ac  servos,  blandiloquentia  a  marito  vel  domino  distrahamus,  ne  maritum  ipsum  ab  uxore  quo  repudiata  nostra  fiat,  ne  dominum  a  servis,  a  quo  expulsi  ad  nos  transeant,  ne  quos  demum  eiusmodi  dolos,  quibus  assueti  sunt  captiosi  homines,  instruamus,  quibus  alienae  res  in  manus  nostras  veniant.  Opus  enim  prohibitum  haud  dubie  oportet  esse,  ubi  voluntas  ipsa  et  cupido,  habendique  cogitatio  prohibetur.  Verum,  si  quis  est  in  nobis  timor  atque  amor  Dei,  potius  hoc  agamus,  ut  non  optemus  modo  suam  cuique  uxorem  et  omnia  sua  salva  atque  integra  manere,  sed  etiam  viri  atque  uxoris  amorem  foveamus,  servos  ad  officium  hortemur,  omnibus  denique  rationibus  suum  cuique  tueamur,  quantum  in  nobis  est.  Quod  vero  aliena  concupiscere  prohibemur,  huc  etiam  referri  debet,  ut  pro  sua  quisque  vocatione  partibus  suis  fungatur,  et  alteri  quod  officii  sui  est  praestet  (Eph.  4).  Alienum  enim  et  concupiscit  et  retinet,  qui  non  exequitur  quae  ex  suae  vocationis  munere  aliis  debet.  Hac  ratione  populus  suos  reges,  principes,  magistratus,  et  alios  sibi  praefectos,  in  honore [p. 71]  habeat,  eorum  dominationem  aequo  animo  ferat,  legibus  et  iussis  pareat,  nihil  detrectet  quod  sub  Dei  voluntate  exequi  possit  (Rom.  13.  1  Petr.  2.  Tit.  3).  Rursum,  illi  plebis  suae  curam  sustineant,  ius  reddant,  publicam  pacem  ac  tranquillitatem  conservent,  bonis  sint  praesidio,  malos  coerceant:  sic  omnia  administrent,  quasi  supremo  regi  ac  iudici  Deo  functionis  suae  rationem  reddituri  (Deut.  17.  2  Paral.  19).  Episcopi  et  ecclesiarum  ministri  fideliter  verbi  ministerio  incumbant,  nec  salutis  doctrinam  adulterent,  sed  puram  et  sinceram  populo  Dei  tradant,  nec  doctrina  solum,  sed  vitae  exemplo  eum  instituant,  praesint  denique  ut  boni  pastores  ovibus  (1  Tim.  3.  2  Tim.  2  et  4.  Tit.  1.  1  Petr.  5).  Populus  [OS  53]  vicissim  eos  pro  nunciis  et  apostolis  Dei  agnoscat,  eum  iis  honorem  reddat,  quo  Dominus  eos  dignatus  est,  quae  eorum  vitae  necessaria  sunt,  praebeat  (Matth.  10.  Rom.  10  et  15.  1  Cor.  9.  Gal.  6.  1  Thess.  5.