8:408  se  desdisoit,  et  a  estre  brusle  tout  vii  s'il  persistoit  en  son  propos.  Quand  on  luy  demanda  qu'il  vouloit  faire,  il  respondit  simplement:  Celuy  qui  me  fera  la  grace  de  mourir  patiemment  pour  son  nom,  me  fera  bien  la  grace  d'endurer  le  feu.  Nous  debvons  prendre  ceste  sentence,  non  pas  comme  d'un  homme  mortel,  mais  comme  du  sainct  Esprit,  pour  nous  asseurer  que  Dieu  n'est  pas  moins  puissant  a  nous  fortifier  et  rendre  victorieux  contre  les  tormens,  qu'a  nous  faire  prendre  une  plus  doulce  mort  en  gre.  Qui  plus  est,  nous  voyons  souventes  fois  quelle  constance  il  donne  aux  povres  malfaicteurs  qui  endurent  pour  leurs  crimes.  Ie  ne  parle  point  des  endurcis,  mais  de  ceulx  qui  se  consolent  en  la  grace  de  Iesus  Christ,  et  par  ce  moyen  recoyvent  d'un  cueur  paisible  la  plus  griefve  punition  qu'on  puisse  faire,  comme  nous  en  voyons  un  si  beau  miroir  au  brigand  qui  se  convertit  a  la  mort  de  nostre  Seigneur  Iesus.  Dieu,  qui  assiste  si  puissamment  aux  povres  criminels,  estans  punis  pour  leurs  mesfaicts,  defauldra-il  aux  siens  qui  combatent  pour  sa  cause,  qu'il  ne  leur  donne  une  vertu  invincible?  Le  troisieme  poinct  des  promesses  que  Dieu  donne  a  ses  Martyrs,  est  du  fruict  qu'ils  doibvent  esperer  de  leurs  souffrances:  et  en  la  fin,  si  besoing  est,  de  leur  mort.  [f.  38]  Or  ce  fruict  est,  qu'apres  avoir  glorifie  son  nom,  avoir  edifie  l'Eglise  par  leur  constance,  ils  seront  recueillis  avec  le  Seigneur  Iesus  en  sa  gloire  immortelle.  Mais  pource  que  nous  en  avons  parle  ci  dessus  plus  a  plein,  c'est  assez  de  le  reduire  maintenant  en  memoire.  Et  ainsi,  que  les  fideles  apprennent  d'eslever  la  teste  hault  a  ceste  couronne  d'immortalite  et  gloire,  a  laquelle  Dieu  les  convie,  a  fin  qu'il  ne  leur  face  point  mal  de  quicter  la  vie  presente  pour  un  tel  loyer;  et  pour  estre  asseurez  de  ce  bien  inestimable,  qu'ils  ayent  tousiours  devant  les  yeulx  ceste  conformite  qu'ils  ont  avec  nostre  Seigneur  Iesus,  pour  contempler  la  vie  au  milieu  de  la  mort,  comme  luy  par  l'opprobre  de  la  croix  est  parvenu  a  la  resurrection  glorieuse,  en  laquelle  gist  toute  notre  felicite,  ioye  et  triomphe.