52:408  Testatur  enim  Paulus  se  illi  mandasse  suas  vices:  quare  ut  apostoli  vicarium  agnosci  ab  omnibus  et  reverenter  excipi  convenit.  Nam  quia  apostolis  nulla  certa  statio  erat  assignata,  sed  evangelii  per  totum  orbem  spargendi  munus  iniunctum:  ideo  quum  ex  urbe  aut  regione  una  se  in  aliam  conferrent,  subrogare  in  suum  locum  solebant  idoneos  homines,  quorum  opera  absolveretur  quod  inchoatum  erat.  Sic  Paulus  se  ecclesiam  Corinthiorum  fundasse  praedicat:  alios  vero  esse  architectos  qui  superaedificat  debeant,  hoc  est  aedificium  promovere.  Hoc  quidem  in  omnes  pastores  competit:  quoniam  semper  incrementis  et  profectu  opus  habebunt  ecclesiae  quamdiu  mundus  durabit.  Sed  ultra  ordinarium  pastorum  munus,  cura  ecclesiae  constituendae  Tito  mandata  erat.  Pastores  enim  constitutis  iam  ecclesiis  et  in  aliquem  ordinem  formatis  praefici  solent:  Titus  vero  plus  quiddam  oneris  sustinebat,  nempe  ut  ecclesiis  nondum  rite  compositis  formam  daret,  ut  certam  politiae  rationem  una  cum  disciplina  constitueret.  Iacto  enim  fundamento  discesserat  Paulus:  proinde  Titi  partes  erant,  opus  in  superficiem  attollere,  ut  iusta  structurae  proportio  exstaret.  Hoc  vocat  corrigere  quae  adhuc  desunt.  Neque  enim  tam  facile  est  opus  ecclesiae  aedificatio,  ut  statim  ad  summum  perduci  queat.  Quamdiu  in  Creta  fuerit  Paulus  incertum  est:  aliquantum  tamen  temporis  illic  transegerat,  fidelem  impenderat  operam  erigendo  Christi  regno.  Non  deerat  summa  peritia,  quanta  in  homine  potest  inveniri.  Laborando  erat  indefessus:  opus  tamen  fatetur  se  rude  ac  mutilum  reliquisse.  Hinc  apparet  difficultas,  et  nos  hodie  experimur  non  unius  anni  vel  duorum  esse  laborem,  collapsas  ecclesias  in  mediocrem  statum  restituere.  Quare  qui  per  annos  complures  assidue  progressi  sunt,  adhuc  ad  multa  corrigenda  intentos  esse  oportet.  Porro  operae  pretium  est  notare  Pauli  modestiam,  qui  libenter  ab  alio  absolvi  patitur  quod  ipse  inchoavit.  Et  quidem  quum  ipso  longe  inferior  esset  Titus,  non  recusat  eum  habere  ercavopfrtoT^v,  qui  operi  suo  extremam  manum  imponat.  Sic  affecti  esse  debent  pii  doctores,  ut  non  ambitiose  quisque  ad  se  trahat  omnia,  sed  alii  alios  certatim  iuvent:  et  quisquis  maiore  successu  laboraverit,  reliqui  gratulentur  potius  quam  invideant.  Neque  tamen  corrigi  voluit  Paulus  quae  ipse  vel  inscitia,  vel  oblivione,  vel  incuria  omiserat  :  sed  quae  per  temporis  brevitatem  exsequi  non  potuerat.  Denique  eam  correctionem  Tito  iniunxit  qua  fuisset  ipse  perfunctus,  si  in  Creta  diutius  stetisset,  non  variando,  non  mutando  quidquam,  sed  quod  deerat,  addendo:  quia  non  fert  operis  difficultas  ut  simul  uno  die  omnia.  Constituas  oppidatim.  Hoc  in  spirituali  aedificio  fere  a  doctrina  secundum  est,  pastores  creari  qui  ecclesiae  gubernandae  curam  habeant.  Ideo  prae