54:407  407  SERMON  III  408  Christ.  Yoila  donc  ce  qu'il  dit,  que  combien  qu'il  soit  pere,  il  ne  laisse  pas  d'estre  du  nombre  des  enfans.  Et  ainsi,  celuy  qui  est  Pere  en  l'Eglise  de  Dieu,  d'autant  qu'il  porte  la  semence  de  vie,  d'autant  que  les  ames  sont  reformees  par  son  moyen  et  par  son  labeur  a  l'image  de  Dieu,  celuy-la  ne  laisse  point  d'estre  du  rang  commun.  Pourquoy?  C'est  la  foy  qui  nous  apporte  un  tel  privilege,  que  nous  soyons  estimez  enfans  de  Dieu:  comme  il  est  dit  au  premier  chapitre  de  sainct  Iehan,  Quiconques  croira  au  Fils  unique,  l'authorite  et  la  grace  luy  est  donnee  d'estre  des  enfans  de  Dieu.  Puis  qu'ainsi  est  donc  que  nous  obtenons  un  tel  bien  par  la  foy,  s'il  est  dit  que  la  foy  est  commune  en  ceux  qui  enseignent,  et  en  ceux  qui  sont  enseignez,  nous  sommes  tous  en  une  compagnie,  et  en  un  ordre,  et  faut  que  Dieu  ait  la  preeminence  luy  seul,  qu'il  domine  par  dessus,  et  qu'il  soit  exalte  luy  seul  comme  Pere.  Et  ainsi  nous  voyons  que  sainct  Paul  sous  ce  mot  de  foy  commune,  s'est  voulu  paisiblement  ranger,  afin  qu'on  n'estimast  point  qu'il  voulust  plus  s'attribuer  qu'il  ne  luy  appartenoit,  ou  bien  qu'il  ne  luy  chalust  point  d'usurper  l'honneur  de  Dieu  a  soy.  Il  a  declare  qu'il  ne  laissoit  point  d'estre  frere  de  Tite,  puis  qu'ils  estoyent  tous  deux  engendrez  par  la  parole  de  Dieu.  Il  est  vray  que  sainct  Paul  avoit  este  devant,  mais  quoy  qu'il  en  soit,  si  est-ce  (comme  desia  nous  avons  dit)  que  d'autant  que  nous  sommes  regenerez  par  l'Esprit  d'adoption  tous  ensemble,  il  faut  que  Dieu  soit  nostre  Pere,  et  que  nous  soyons  humiliez  sous  luy,  et  qu'un  chacun  s'y  assuiettisse,  et  que  nul  ne  vueille  dominer  sous  ombre  de  la  foy  de  l'Evangile,  comme  s'il  avoit  authorite  de  soy-mesme:  mais  que  Dieu  demeure  en  son  entier,  et  que  rien  ne  luy  soit  diminue,  et  que  cependant  les  hommes  le  servent  chacun  en  son  estat  et  en  sa  vocation.  Or  en  la  fin  il  dit,  Grace,  misericorde  et  paix  de  par  Dieu  le  Pere,  et  de  par  Iesus  Christ  nostre  Sauveur.  Communement  sainct  Paul  en  saluant  les  freres,  se  contente  de  ces  deux  mots,  Grace  et  Paix:  signifiant  (comme  nous  avons  declare  en  d'autres  passages)  que  tout  nostre  bien  et  felicite  gist  en  cela,  que  nous  soyons  reconciliez  a  Dieu,  qu'il  nous  tiene  en  sa  faveur  et  en  son  amour.  Yoila  donc  la  source  de  tout  ce  que  nous  devons  desirer,  c'est  que  Dieu  nous  aime,  et  qu'il  nous  soit  propice:  car  cependant  que  nous  l'aurons  contraire,  malheur  sur  nous,  encores  que  tout  le  monde  eust  conspire  de  nous  aider:  mais  si  Dieu  nous  accepte  a  soy,  encores  que  nous  soyons  miserables  selon  le  sens  humain,  tant  y  a  que  tout  nous  sera  converti  a  bien  et  a  salut.  Ce  n'est  pas  donc  peu  de  chose  que  ceste  grace  dont  parle  sainct  Paul:  mais  notamment  il  l'appelle  grace,  plustost  que  dilection  ou  amour,  pource  que  c'est  une  amour