47:407  407  IN  EVANGELIUM  IOANNIS  408  sciatis,  quod  in  eo  nullum  crimen  invenio.  5.  Exivit  itaque  Iesus  foras,  portans  spineam  coronam  et  purpuream  vestem.  Tunc  dixit  eis:  Ecce  homo.  6.  Quum  ergo  vidissent  eum  sacerdotes  et  ministri,  clamarunt  dicentes:  Crucifige,  crucifige.  Dicit  eis  Pilatus:  Accipite  eum  vos  et  crucifigite.  Ego  enim  non  invenio  in  eo  crimen.  1.  Apprehendit  Pilatus  Iesum.  Perstat  in  suo  consilio  Pilatus.  Priori  tamen  ignominiae  secundam  addit,  quia  Iudaeos  sperat  mediocri  ista  castigatione  contentos  fore,  ubi  caesus  flagellis  fuerit  Christus.  Quod  autem  tam  sollicite  laborat  et  nihil  proficit,  in  eo  coeleste  decretum  nobis  reputandum  est,  quo  destinatus  erat  Christus  ad  mortem.  Interea  eius  innocentia  saepius  testimonio  iudicis  asseritur,  ut  sciamus  eum  ab  omni  culpa  immunem  pro  aliis  reum  substitui,  et  poenam  alienis  peccatis  debitam  subire.  In  Pilato  vero  notabile  exemplar  trepidae  conscientiae  cernimus.  Christum  ore  suo  absolvit  et  fatetur  nullum  in  eo  esse  crimen,  poenam  tamen  infligit  tanquam  noxio.  Ita  huc  illuc  transferri  et  in  contrarias  pugnantesque  sententias  distrahi  necesse  est,  quibus  non  est  tantum  animi  ut  quod  rectum  est  inflexibili  constantia  defendant.  Damnamus  Pilatum  omnes:  interea  dictu  pudendum  est,  quam  multos  similes  habeat  mundus,  qui  Christum  non  modo  in  eius  membris,  sed  in  doctrina  etiam  flagellant.  Multi,  ut  servent  a  morte  qui  pro  evangelio  laborant,  eos  cogunt  ad  impiam  Christi  abnegationem.  Quid  hoc  aliud  est,  quam  Christum  ludibrio  exponere  ut  infamem  vitam  degat?  Alii,  dum  pauca  quaedam  excerpunt  ex  evangelio  quae  probent,  totum  evangelium  lacerant.  Praeclarum  aliquid  effectum  putant,  si  pauci  crassi  abusus  correcti  fuerint.  Atqui  praestaret  sepultam  esse  doctrinam  ad  tempus  quam  sic  flagellari:  nam  diabolo  et  tyrannis  omnibus  invitis  renasceretur.  Nihil  autem  difficilius,  quam  suae  puritati  restitui,  ubi  semel  corrupta  fuit.  2.  Milites  plectentes  coronas.  Hoc  procul  dubio  iussu  Pilati  factum  est,  ut  notam  criminis  inureret  filio  Dei  quod  se  regem  fecisset:  atque  id  ad  explendam  Iudaeorum  rabiem,  quasi  persuasus  esset  Christum  iure  ab  illis  fuisse  accusatum.  Militum  tamen  improbitas  et  lascivia  ultra  iudicis  imperium  exsultat  :  sicuti  impii,  simul  ac  male  agendi  oblata  est  occasio,  eam  cupide  arripiunt.  Mira  autem  gentis  saevitia,  cuius  animos  tam  triste  spectaculum  ad  misericordiam  non  flectit,  sed  Deus  hoc  totum  gubernat,  ut  mundum  sibi  reconciliet  filii  sui  morte.  6.  Accipite  eum  vos.  Noluit  Christum  tradere  in  eorum  manus,  neque  libidini  permittere:  tantum  se  fore  negat  eorum  carnificem,  quod  ex  ratione  mox  addita  patet,  ubi  dicit,  se  nullum  invenire  in  eo  crimen,  ac  si  diceret,  se  nunquam  adductum  iri,