55:406  iustificatum,  de  approbatione  iustitiae  loquitur.  Ergo  quum  sophistae  Iacobum  Paulo  opponunt,  hallucinantur  in  ambigua  significatione  nominis:  quia  Paulus  quum  fide  iustificari  nos  tradit,  nihil  aliud  significat  quam  nos  obtinere  ut  iusti  coram  Deo  censeamur.  Iacobus  autem  longe  alio  spectat,  nempe  ut  qui  fidelem  se  profitetur,  fidei  suae  veritatem  operibus  demonstret.  Oerte  Iacobus  hic  docere  non  voluit  ubi  quiescere  debeat  salutis  fiducia:  in  quo  uno  insistit  Paulus.  Ergo  ne  in  paralogismum  incidamus,  qui  sophistas  fefellit,  notanda  est  haec  amphibologia:  Iustificandi  verbum,  Paulo  esse  gratuitam  iustitiae  imputationem  apud  Dei  tribunal:  Iacobo  autem  esse  demonstrationem  iustitiae  ab  effectis,  idque  apud  homines:  quemadmodum  ex  superioribus  verbis  colligere  licet:  Ostende  mihi  fidem  tuam,  ete.  Hoc  sensu  fatemur  sine  controversia  iustificari  hominem  operibus.  Quemadmodum  si  quis  hominem  magni  et  pretiosi  fundi  emptione  ditatum  esse  dicat,  quia  eius  divitiae,  quae  prius  occultae  in  arca  clausa  latebant,  innotuerint.  Quum  fidem  dicit  cooperatam  fuisse  operibus,  et  ex  illis  perfectam:  iterum  ostendit,  non  esse  hic  quaestionem  de  salutis  nostrae  causa,  sed  utrum  opera  necessario  fidem  comitentur.  Nam  hoc  sensu  dicitur  cooperata  fuisse  operibus,  quia  otiosa  non  fuit.  Dicitur  ex  operibus  fuisse  perfecta,  non  quod  inde  suam  perfectionem  accipiat,  sed  quod  vera  esse  inde  comprobetur.  Nam  quod  ex  his  verbis  sophistae  putidam  suam  distinctionem  fidei  formatae  et  informis  eliciunt,  longa  refutatione  non  indiget.  Formata  enim  adeoque  expolita  erat  Abrahae  fides  ante  filii  immolationem.  Opus  autem  illud  non  fuit  quasi  extrema  manus:  quoniam  multa  deinde  sequuta  sunt  quibus  fidei  suae  incrementa  monstravit  Abraham.  Quare  neque  fuit  illa  fidei  eius  perfectio,  neque  tunc  primum  formam  induit.  Nihil  itaque  aliud  intelligit  Iacobus,  quam  eius  integritatem  inde  constitisse  quod  praeclarum  illum  obedientiae  fructum  edidit.  23.  Impleta  fuit  scriptura.  Qui  opera  Abrahae  in  iustitiam  fuisse  imputata  Iacobi  testimonio  probare  volunt,  scripturam  ab  eo  male  torqueri  fateantur  necesse  est.  Nam  quocunque  se  vertant,  nunquam  efficient  ut  prior  sit  effectus  sua  causa.  Citatur  locus  Mosis  ex  Geneseos  cap.  15,  6.  Imputatio  iustitiae,  cuius  Moses  illic  meminit,  plus  triginta  annis  praecessit  opus  illud  quo  Abraham  iustificatum  esse  volunt.  Certe  quum  annis  quindecim  ante  natum  Isaac  fides  imputata  esset  Abrahae  in  iustitiam,  non  potuit  hoc  fieri  per  illius  immolationem.  Nodo  insolubili  constrictos  teneo  quicunque  iustitiam  Abrahae  coram  Deo  imputatam  fingunt  quia  immolavit  filium  Isaac,  qui  nondum  natus  erat  quum  spiritus  sanctus  pronuntiat  iustum  fuisse  Abraham.  Itaque  necessario  restat  ut  aliquid  posterius  notari  26*