41:406  combien  qu'il  parle  en  doute,  si  dit  il  encores,  ton  Dieu  est  celuy  qui  te  delivrera.  Nous  qui  sommes  tous  les  iours  enseignes  en  l'escriture  saincte,  qui  devons  estre  tous  resolus  de  la  puissance  de  Dieu,  il  ne  faut  point  que  nous  parlions  comme  Darius,  mais  il  faut  que  nous  soions  asseures  en  nos  coeurs,  que  Dieu  nous  delivrera  de  nos  maus,  mais  il  s'en  faut  beaucoup  que  nous  suivions  encores  le  roy  Darius,  nous  sommes  si  froids  que  c'est  grand  pitie.  Pouvons  nous  avoir  une  seulle  petite  connoissance  et  iugement,  que  l'office  de  Dieu  est  de  nous  delivrer?  Car  comment  est  ce  qu'un  chacun  est  resolu  de  sa  puissance,  ie  vous  prie?  voici  donc  une  sentence  qui  nous  devroit  faire  grand  vergongne,  qu'un  pauvre  paien,  qui  n'a  iamais  este  instruit,  qui  a  seulement  oui  parler,  comme  en  passant,  qu'il  y  avoit  un  Dieu  en  Israel,  qui  s'estoit  declare  a  Abraham,  et  a  Moise,  que  ce  Dieu  la  estoit  adore  en  Ierusalem.  Quand,  di-ie,  ce  pauvre  roy  qui  n'avoit  point  conneu  la  verite  de  Dieu  parle  ainsi,  qu'il  croit  que  Dieu  delivrera  Daniel,  que  devons  nous  faire,  nous  qui  devons  estre  confits,  par  maniere  de  dire,  en  cette  doctrine  que  Dieu  veut  desploier  sa  vertu,  pour  nous  secourir,  si  nous  mettons  nostre  fiance  en  luy?  Ne  devons  nous  point  avoir  de  cela  une  resolution  certaine  et  indubitable  en  nous?  Ainsi  donc  voici  une  sentence  qu'il  nous  faut  bien  noter  quant  il  est  dit,  que  le  roy  Darius  console  Daniel,  en  disant,  Daniel,  ton  Dieu  te  delivrera,  que  nous  sachions  puis  qu'un  roy  paien,  un  pauvre  homme  ignorant  a  encores  fait  cest  honneur  a  Dieu,  de  dire  que  c'est  luy  qui  delivre  les  siens,  qu'il  leur  tent  la  main  quand  ils  seront  destitues  de  toute  aide  humain.  Que  quand  Dieu  parle  a  nous,  qu'il  nous  declare,  et  non  point  pour  une  fois  seulement,  mais  qu'il  nous  conferme  en  reiterant  cette  promesse  la,  qu'il  nous  assistera,  que  quasi  en  chacune  page  de  l'escriture  nous  trouverons  cette  promesse,  sept  ou  huit  fois,  quand  donc  nostre  Seigneur  insiste  tant  sur  cela,  pour  dire,  appuies  vous  sur  moy,  et  ie  vous  soulageray,  ne  sommes  nous  pas  plus  que  malheureux,  si  nous  ne  repondons  amen?  aians  foy,  et  ne  doutans  point  qu'il  n'acomplisse  ce  qu'il  ha  promis.  Voila  donc  comme  il  nous  en  faut  faire,  voiant  qu'un  pauvre  incredule  a  ainsi  parle,  qu'il  faut  bien  que  nous  parlions  d'une  autre  facon.  Et  pourquoy?  c'est  Dieu  qui  parle  auiourd'hui  a  nous,  nous  n'avons  point  un  Darius,  ni  quelqu'un  qui  soit  mene  d'un  sens  naturel,  mais  c'est  Dieu  qui  nous  rend  tesmoignage  de  sa  bonne  volonte,  et  n'est  il  pas  asses  suffisant  pour  nous  certifier?  Mais  quoy,  il  ne  faut  rien  pour  nous  faire  defier  de  Dieu,  nous  n'attendons  pas  que  nous  soions  assaillis  de  griefves  tentations,  mais  qu'il  tombe  une  souille  d'arbre,  nous  voila  espouvantes,  comment  donc  pourrons  nous  subsister  26*