8:405  405  IL  DE  SOUFFRIR  PERSECUTION".  406  que  nous  ne  luy  eussions  rien  promis.  Par  cela,  ie  n'impose  point  necessite  a  tous  de  faire  confession  pleine  et  entiere  de  tout  ce  qu'ils  croyent,  ia  soit  qu'ils  en  fussent  mesme  requis.  Ie  scay  aussi  quelle  mesure  sainct  Paul  y  a  tenu,  lequel  estoit  autant  delibere  que  nul  autre  a  maintenir  franchement  la  cause  de  l'Evangile  comme  il  debvoit.  Et  aussi  ce  n'est  point  sans  cause  que  nostre  Seigneur  Iesus  nous  promet  qu'en  tel  cas  Dieu  nous  donnera  bouche  et  sagesse,  comme  s'il  disoit  que  l'office  du  sainct  Esprit  n'est  pas  seulement  de  nous  fortifier  a  estre  hardis  et  vaillans,  mais  aussi  de  nous  donner  prudence  et  discretion  pour  nous  scavoir  bien  guider  selon  qu'il  sera  expedient.  Le  tout  est  que  ceulx  qui  sont  en  telle  destresse  demandent  et  recoyvent  telle  prudence  d'en  hault;  ne  suyvans  point  leur  conseil  charnel,  pour  trouver  moyen  d'echapper  a  travers  des  marez,  comme  on  dit.  Il  y  en  a  qui  replicquent,  que  nostre  Seigneur  Iesus  mesme  n'a  pas  respondu  a  ceulx  qui  l'ont  interrogue.  Mais  ie  di,  premierement,  que  cela  n'est  pas  pour  abolir  la  reigle  qu'il  nous  a  donnee,  de  faire  confession  de  notre  foy  quand  nous  en  sommes  requis.  Ie  di,  pour  le  second,  qu'il  n'a  iamais  rien  dissimule  pour  sauver  sa  vie.  Tiercement,  que  iamais  il  n'a  donne  response  si  ambigue,  qu'elle  n'emportast  suffisant  tesmoignage  de  ce  qu'il  avoit  a  dire;  ou  bien,  que  desia  il  n'eust  satisfaict  a  ceulx  qui  le  venoyent  interroguer  derechef,  comme  tendans  des  filets  pour  le  surprendre.  Pourtant,  que  ce  poinct  demeure  resolu  entre  tous  Chrestiens,  c'est  qu'ils  ne  doibvent  point  tenir  leur  vie  plus  precieuse  que  le  tesmoignage  [f  35]  de  la  verite,  entant  que  Dieu  veult  estre  glorifie  en  iceluy.  Estce  en  vain  qu'il  appelle  ses  tesmoings  (car  le  mot  de  Martyr  signifie  cela)  tous  ceulx  qui  ont  a  respondre  aux  ennemis  de  la  foy?  N'est-cepas  pource  qu'il  s'en  veult  servir  a  tel  usage?  Et  ne  fault  pas  que  chascun  regarde  yci  son  compaignon,  car  Dieu  ne  fait  pas  cest  honneur  a  tous  de  les  appeler  la.  Et,  d'autant  que  nous  y  sommes  enclins,  il  nous  en  fault  mieulx  garder.  Pierre,  ayant  ouy  de  la  bouche  de  nostre  Seigneur  Iesus,  qu'on  le  meneroit  en  sa  vieillesse  ou  il  ne  vouldroit  pas,  demanda  que  deviendroit  Iehan,  son  compaignon.  Il  n'y  a  celuy  de  nous  qui  ne  feist  volontiers  telle  replicque;  car  ceci  nous  vient  incontinent  en  fantasie:  Pourquoy  est-ce  que  i'endure  plustost  que  les  autres?  Au  contraire,  Iesus  Christ  nous  exhorte  tous  en  commun,  et  chascun  en  particulier,  de  nous  tenir  prests,  a  fin  que,  selon  qu'il  appellera  les  uns  ou  les  autres,  nous  marchions  en  nostre  ranc.  I'ay  desia  expose  ci-dessus,  que  nous  serons  mal  apprestez  a  souffrir  martyre,  sinon  que  nous  soyons  armez  des  promesses  de  Dieu.  Il  reste  maintenant  de  deduire  un  peu  plus  a  plein  a  quoy  elles  tendent: